image

Լոյսերու մէջ հանգչիս սիրելի Տիկին Մարի. Անուշ Նագգաշեան

Լոյսերու մէջ հանգչիս սիրելի Տիկին Մարի. Անուշ Նագգաշեան

Սաղիմահայ բանաստեղծ Անուշ Նագգաշեան սրտառուչ խօսք մը գրած է իր դիմատետրի էջին ի յարգանս նորոք հանգուցեալ Տիկն. Մարի Պալեանին:

 

Հայուհի մը, որ ապրեցաւ ոչ միայն որովհետև աշխարհ եկած էր, այլ ունէր իր առաքելութիւնը և գիտակից էր անոր, ապրեցաւ որովհետև տալիք ունէր հայ արուեստին և հայ արուեստով աշխարհին...

Տիկին Մարի Պալեան...

Հայուհի մը, որմով միշտ հիացած եմ, յարգած և երբ առիթներ եղան աւելի մտերիմ ծանօթութեան՝ նաև սիրած։

60 և աւելի տարիներ առաջ ձգեց Ֆրանսան և եկաւ Երուսաղէմ, հետևելով իր սիրած մարդուն՝ սաղիմահայ ազգային Պրն. Սեդրակ Պալեանին։

Իր ներդրումը ունեցաւ Քէօթահիայէն յատուկ հրաւիրուած և Երուսաղէմ հաստատուած Պալեաններու հիմնած յախճապակիի արուեստանոցին մէջ և գծեց ի՛ր ուղին, դժուար ուղի, որովհետև արուեստի աշխարհը ունի իր յատուկ դժուարութիւնները, սակայն տիկին Մարիին համար ի՜նչ դժուարութիւն... Ան իր աշխարհը գտած էր... Մինչև անհանգստութիւնը վրձինը իր անբաժան ընկերն էր...

Լոյսերու մէջ հանգչիս սիրելի Տիկին Մարի, ուրախ եմ, որ ճանչցեր եմ, սիրեր եմ և հիացեր եմ քեզմով...։