14.09c
Երեվան
չրք, մյս 22
«Մենք երկու զաւակ ունինք, զաւակներս եւ ամուսինս աս ձեր տեսած քարերուն տակէն ելան եւ հրաշքով փրկուեցան»,- «Արեւելք»ին ըսաւ Գոհար Գալուստեան: Հալէպ բնակող հայուհին նաեւ յայտնեց, որ ուրբաթ օր եղած հրթիռարձակումներուն հետեւանքով իրենց բնակարանը ծանրօրէն վնասուած է եւ աւերակուած վիճակ մը ունի (տեսնել լուսանկարները): Գոհար, որ կինն է Ժանօ Գալուստեանի, «Արեւելք»ին խօսելով պատմեց, որ իրենց տունը երկու հրթիռ ինկաւ, առաջինը՝ ժամը 1:20 (ուրբաթ օր), եւ երկրորդը` դէպքէն տասը րոպէ ետք, եւ տունը ծանր վնասներ կրեց: «Փառք Աստծոյ, որ կրցանք այս ծանր վիճակէն ետք ողջ-առողջ դուրս գալ»,-ըսաւ ան: Գալուստեան նաեւ յուսահատական շեշտով մը խօսելով ըսաւ, որ ամբողջ հալէպահայութիւնը այսօր վտանգաւոր վիճակի մը մէջ է եւ իրենք ամէն օր կը պայքարին մահուան դէմ: Ան այս առումով ըսաւ «Ես կը կարծեմ, որ հալէպահայութեան համբերութիւնը սպառած է: Դժխբախտաբար մեր քաղաքի պատերազմը վերջանալիք չունի եւ կը մաղթեմ, որ բոլոր հոս գտնուող հայերը դուրս գան այստեղէն, ու ես ալ ընտանիքիս հետ պատրաստ եմ ալ հեռանալ Հալէպէն»:
