image

Լիբանան վտանգուա՞ծ

Լիբանան վտանգուա՞ծ

Շատ   արագ  եւ անսպասելի զարգացումներ  կը կատարուին շրջանին մէջ:  Մինչ   Լիբանանի վարչապետ Սաատ Հարիրի       կը ներկայացնէր  իր «անսպասելի»  հրաժարականը, անդին Սէուտական Արաբիա      ծանրագոյն  մեղադրանքներ կը հնչեցնէր   երկրի  կառավարութեան  դէմ զայն   համարելով «պատերազմի  կառավարութիւն»:

       Հարիրիի    «պայթեցուցած»  քաղաքական  ռումբին ազդեցութիւնները   տակաւին  կը  շարունակուին ու  Պէյրութի   բարձրագոյն  շրջանակներ ( նախագահական   պալատ,  նախագահ եւ խորհրդարանի նախագահ)   «ափ ի  բերան» մնացած են  պատահածէն:

 

  Երկրի նախագահ  զօր. Միշէլ Աուն, որ յայտնի  է դէպքերուն      արագ արձագանք   տալու իր բնազդով   ցարդ չէ  կարողացած  «հասկնալ» եղածները եւ մինչեւ այս պահը    կը մերժէ  ընդունիլ Հարիրիի  հրաժարականը:

    Երէկ  Պաապտայի  նախագահական  պալատը   «մեղուաբոյն»ի  վերածուած էր  ու մէկէ աւելի բանբերներ կը յայտարարէին,  որ նախագահը կը սպասէ  Հարիրիի վերադարձը  վերջնական կողմնորոշում  ունենալու եւ «վճիռ» մը հրապարակելու համար:

    Եղածը   «մեծ  խաղ» է եւ       դէպքերուն ընթացքը         սկիզբ  կ'առնէ  Լիբանանէն  եւ կը տարածուի      ամբողջ  շրջանին  մէջ:

 

 Ռիատ   որոշած է հակահարուած    տալ  Թեհրանին եւ այդ   հակահարուածի      գետինը  կրնայ   Պէյրութը  ըլլալ:   Այս բոլորին առընթեր  բացի անկէ, որ մեծագոյն տուժողը   Լիբանանը  կրնայ ըլլայ, յստակ սկսած է դառնալ,  որ   հարցման  նշաններ կան  երկրի     ապահովութեան, ելեւմտական կայունութեան եւ  յատկապէս  երեսփոխանական ընտրութեանց    ճակատագրին վերաբերեալ:

 

 Յստակ է նաեւ, որ Սէուտական Արաբիոյ «նոր»  ղեկավարութիւնը     գլխաւորութեամբ  գահաժառանգ Մոհամմատ Պըն     Սըլմանի  այս   արարքներով    «մէկ քարով» մի քանի «թռչուն» կը  զառնեն:

  Խօսքը անշուշտ  թագաւորութեան սահմաններէն ներս    եղած   զարգացումներուն մասին է,  որոնց արձագանքները   պիտի տարածուին  ամբողջ  շրջանին  մէջ:

  Ռիատ  եւ Թեհրան  պարանաձգութեան  հերթական «զոհ»ը   Լիբանանը  կրնայ ըլլալ,  մանաւանդ, որ    երկիրը    բաւարար  ներուժ  չունի     դէմ դնելու  իր ուղղութեամբ  բարձրացող   ալիքներուն:

 

 Յուսատու է  այն, որ  Լիբանանի  հանրապետութեան  նախագահ  զօր. Միշէլ Աունը յայտնի  է իր   ամուր կեցուածքներով,   որոնք  սակայն    կրնայ  պահել   երկրի ապահովական    անդորրը ... իսկ  ելեւմտական  իրավիճակին   մասին   այլ խօսք:

 

 Ամէն պարագայի   յառաջիկայ օրերուն յստակ կը դառնայ,  թէ   ին՞չ են Լիբանանին դէմ  բարձրացող ալիքներուն  ուժգնութիւնը եւ ինչքանով վտանգուած է  իր     տարածութեամբ    փոքրիկ, սակայն իր ռազմավարական  արժէքով մեծ   այդ  հիւրընկալ երկիրը: 

 

 «Ա»