Սուրիոյ մէջ դէպքերու արագ զարգացումը առիթ կը ստեղծէ, որ հակամարտութեան մէջ ներգրաւուած կողմերէն իւրաքանչիւրը ճգնաժամի լուծման իր տարբերակը մշակէ, որ եւ շատ անգամ կը հակասէ միւս կողմերու շահերուն եւ պատկերացումներուն:
Իրան, որ կը ձգտի իր ուժերը առաւել մեծ մակարդակով տարածել սուրիական հողերուն վրայ, կը խանգարէ ռուսական կողմի հեռանկարները, որ իր հերթին կը միտի սահմանափակել իրանեան ուժերու ներկայութիւնը:
Իր հերթին Իրան օրերս քննադատութեան ենթարկած է Ռուսիան, մեղադրելով վերջինս Իրանի դէմ ուղղուած իսրայէլեան հարուածներուն նպաստելու, ինչպէս նաեւ ԱՄՆ-ի հետ վերջերս համաձայնութիւններ կնքելու մէջ:
«Lebanon 24» լրատուական կայքը, վկայակոչելով Սուրիոյ ընդդիմադիր աղբիւրներու յայտարարութիւնները, նշած է, որ Թեհրան երկար ժամանակ ձգտած է Ռուսիոյ եւ Թուրքիոյ հետ դաշինք կազմել, սուրիական հողերէն բաժին ստանալու միտումով, սակայն հիասթափութիւնն առաջ եկաւ այն բանէն ետք, երբ Թուրքիա ԱՄՆ-ի հետ շարք մը գաղտնի համաձայնութիւններ կնքեց: