Շուտով լույս կտեսնի հրապարակախոս, գործարար Սևակ Արծրունու հեղինակած «Մեր հնարավոր ապագան» խորագրով գիրքը, որը հանրությանը կծանոթացնի նրա և համախոհների ջանքերով սկիզբ դրված «Կառուցիր Հայաստան» նախագծի գաղափարախոսության և տեսլականի հետ: «Արևելքի» հետ հարցազրույցում Սեւակ Արծրունին ասաց, որ գրքում արծարծվում են այսօր հայությանը հուզող հարցեր, հայաշխարհի շատ խնդիրներ, իսկ «Կառուցիր Հայաստան» նախագիծը հայրենադարձության և ամուր տնտեսությամբ Հայաստան ունենալու տեսլականն է, որ տարիներով փայփայել են շատերը: Լինելով Հայաստանում շինարարական հայրենադարձության հիմնադիր՝ Սևակ Արծունին լավ է պատկերացնում սփյուռքահայության տրամադրությունները՝ հայրենիք վերադառնալու և այստեղ հաստատվելու ուղղությամբ: Այդ առումով նա իրականացնում է բազմաթիվ ծրագրեր, նշելով, որ այսօր, աշխարհի քաղաքական ու տնտեսական դրությունն այնպիսին է, որ հայերի համար հայրենիքը շենացնելու պատեհ առիթ է ստեղծվել է. «Ոչ միայն Միջին Արեւելքում, այլև ամբողջ աշխարհում, նույնիսկ հարուստ Եվրոպայում տնտեսական լճացում է: Եվրոպայից գործարաններն ու աշխատատեղերը տեղափոխվում են Ամերիկա եւ Ծայրագույն Արևելք: Այս պայմաններում մենք հայտնվում ենք մի աննախադեպ խոշոր պատեհության առջև, որի նպատակն է հայության ժողովրդագրական, տնտեսական և գիտելիքների անսահման ներուժը տեղափոխել Հայաստան կամ առնվազն դարձնել հայաստանակենտրոն:
Մեր նպատակը պետք է լինի Հայաստանը դարձնել ոչ միայն բարեկարգ և բարգավաճ երկիր, այլ նաև երրորդ հազարամյակի համաշխարհային քաղաքակրթության ջահակիր երկիր»,-ասում է նա:
Գործարարի՝ հայրենիքում իրականացրած ծրագրերի շնորհիվ չորս տարվա ընթացքում մոտ 300 սփյուռքահայ ընտանիք հայրենադարձության նպատակով կառուցված բնակարաններում բնակարան է ձեռք բերել և արդեն բնակվում է, իսկ ևս 400 ընտանիք էլ սպասում է և այդ բնակարանները կունենա առաջիկա երկու տարում:
Հայրենադարձության ծրագրերը, ըստ նրա, Հայաստանի տնտեսությանն ու հասարակությանը տվել են բազմաթիվ օգուտներ: Դրանցից գլխավորը աշխատատեղերի ստեղծումն է: Ակնհայտ է նաև, որ հասարակության մտածողության մեջ, հայրենադարձների՝ Հայաստան գալով և նոր մշակույթ բերելով, փոփոխություններ են կատարվել: Մերձավոր Արևելքում ապրող սփյուռքահայերի մոտ նույնպես Հայաստանում հաստատվելու առումով, ըստ Սևակ Արծրունիի, կտրուկ փոփոխություններ են տեղի ունեցել, մինչ այդ, նրանց մոտ կարծրացած պատկերացում կար բնակարան ձեռք բերելու և հայրենադարձվելու ուղղությամբ. Նրանց իրականացրած ծրագրերով կոտրվել են կարծրատիպերը:
Սևակ Արծրունին «Արևելքի» հետ հարցազրույցում խոսել է նաև «Կառուցիր Հայաստան» ծրագրի, Հայաստանի անկախության ձեռքբերումների և այլ հարցերի շուրջ:
Հարցազրույցը՝ այստեղ։