«Արեւելքի» հարցերուն կը պատասխանէ Երեւան հաստատուած Սեւան Ատուրեան.
-Ի՞նչ պայմաններու տակ եւ ե՞րբ ստեղծեցիք օտար լեզուներ դասաւանդող ձեր կեդրոնը:
2015-ին, Երեւանի մէջ, ստեղծեցինք «Ռոզըրի» լեզուներու կեդրոնը: Ուսումնասիրելով հայ կրթական ոլորտը, ուսանողներուն լեզուներու հանդէպ ունեցած մեծ հետաքրքրութիւնը եւ իրենց չյագեցած լեզուական կարիքները՝ ուզեցինք ստեղծել համաշխարհային ուսումնական մեթոտներով եւ չափանիշներով յագեցած կրթական նոր միջավայր մը:
-Ի՞նչ է գլխաւոր նպատակը այս կեդրոնին:
Մեր գլխաւոր նպատակն է նպաստել հայրենիքի զարգացումին, ստեղծելով ամենալաւ պայմանները մեր ուսանողներուն համար, որպէսզի անոնք կարողանան զարգացնել իրենց լեզուական հմտութիւնները ճիշդ ձեւերով եւ հնարաւորինս կարճ ժամանակի մը մէջ: Մեր առաքելութիւնն է ի յայտ բերել ուսանողներուն կարողութիւնները, մղելով զիրենք դառնալու ինքնավստահ, լայնամիտ, առողջ մտածող հաղորդակիցներ եւ անհատներ: Մեր նպատակն է նաեւ պահպանել հայ մշակոյթը եւ ոգին՝ մեր կողմէ կազմակերպուած տարբեր միջոցառումներու ընդմէջէն։
-Ի՞նչ ոլորտներէ են ձեր ուսանողները:
Մենք ունինք տարբեր ոլորտներու ուսանողներ, սովորական ուսանողներ՝ սկսած 5 տարեկանէն մինչեւ 65 տարեկան: Ունինք նաեւ մասնագիտական ուղղութիւններով խումբեր, օրինակ՝ բժշկական, իրաւաբանական, գործարարներու եւայլն: Չմոռնանք նշել նաեւ TOEFL iBT, IELTS եւ շտեմարաններու նախապատրաստական դասընթացքներու հետեւող մեր խումբերը:
-Ո՞ր լեզուն ամենաշատ պահանջուած է եւ, ձեր կարծիքով, ի՞նչ պատճառներով:
Մենք հայերս հետաքրքրուած ենք տարբեր լեզուներ սորվելով, բայց ամենաշատ պահանջարկ ունեցող լեզուն անգլերէնն է, որովհետեւ համաշխարհային ուսումնական ընդունելութեան եւ առեւտուրի յարաբերութիւններու ծիրէն ներս այն հաղորդակցման հիմնական միջոցն է:
-Բնականաբար հայաստանցի ուսանողներ ալ ունիք, երբեւէ լեզուական առումով դժուարութիւններ կ'ունենա՞ն:
Ընդհանրապէս լեզու սորվողները, հայ կամ օտարներ, կրնան ունենալ մէկ հիմնական դժուարութիւն՝ օտար լեզուն անընդհատ համեմատել ու նաեւ թարգմանել մայրենի լեզուէն, որ արգելք կրնայ հանդիսանալ օտար լեզուով ճիշդ արտայայտման ընթացքին:
-Եթէ մօտիկ անցեալի Հալէպի լեզուական կամ ուսուցողական մակարդակին հետ համեմատենք, ի՞նչ տարբերութիւններ կան Երեւանի եւ Հալէպի միջեւ:
Հալէպի եւ Երեւանի միջեւ համեմատութիւն ընելը այդքան ալ ճիշդ եւ արդար չէ, որովհետեւ այս երկու քաղաքները իրարմէ կը տարբերին իրենց բնակչութեան թիւով, մտածելակերպով եւ լեզուներ ձեռքբերելու ունակութիւններով:
-Որպէս սփիւռքահայ համոզուա՞ծ էք որ ձեր ապագան Հայաստանի մէջ է, թէ այս մէկը առժամեայ կեցութիւն մըն է:
Անկասկած բոլոր հայերուն ապագան Հայաստանի մէջ է:Մենք պէտք է կերտենք մեր ապագայ հայրենիքը, կրթելով եւ պատրաստելով գիտակից, զարգացած եւ բարեացակամ հայ քաղաքացիներ: Այժմ մենք կ'աշխատինք այդ առումով, յոյս ունենալով աւելի ընդարձակել մեր լեզուի կեդրոնի գործունէութիւնը: