Ստամբուլում վաղը՝ դեկտեմբերի 11-ին կանցկացվի Պոլսո 85-րդ պատրիարքի ընտրությունը, որը պատրիարքական ընտրարշավի վերջին փուլն է: Մինչ այդ արդեն ընտրվել են աշխարհիկ պատգամավորները, որոնք վաղը ընտրություն պիտի կատարեն պատրիարքի երկու թեկնածուների՝ Արամ արք. Աթեշյանի և Սահակ եպս. Մաշալյանի միջև: Ինչպես տեղեկանում ենք Պոլսից, ժողովրդի կողմից օրերս ընտրված պատգամավորների թվից պարզ է դառնում, որ մեծամասնություն են կազմում Սահակ եպս. Մաշալյանի աջակից պատգամավորները: Նրան աջակցող պատգամավորները 89-ն են, իսկ Աթեշյանի աջակիցներից ընտրվել են 12-ը: Ընտրությանը մասնակցելու է նաև 17 կրոնական պատգամավոր, որոնց մեծամասնությունը, ըստ տեղեկությունների, նույնպես Մաշալյանի աջակիցներն են: Ընտրված պատվիրակներից մեկն էլ «սպիտակ քվե»,-ով է մասնակցելու, ինչը նշանակում է, որ դեմ է ընտրությանը:
Հայ առաքելական եկեղեցու կյանքում այս շաբաթը համարվում է պատմական, քանի որ երկար ժամանակ գործող պատրիարք չունենալուց հետո Հայ Առաքելական Եկեղեցու նվիրապետական աթոռներից մեկը՝ Պոլսո պատրիարքությունը, վերջապես ունենալու է գահակալ:
Ավանդաբար, պատրիարքական ընտրարշավի համար ընտրում է երկու գույն՝ նարնջագույն եւ մանուշակագույն: Այս ընտրությանը Սահակ եպս. Մաշալյանն ու նրա աջակիցները կրում էին նարնջագույն, իսկ Արամ արք. Աթեշյանն ու իր աջակիցները՝ մանուշակագույն գույները: