17.09c
Երեվան
երք, մյս 21
Լիբանանահայ բժիշկ Րաֆֆի Փոլադյանն «Արևելքի» հետ զրույցում, կարևորելով սուր շնչառական վարակները հաղթահարելու հարցում ժողովրդական միջոցների դերը, նշեց, որ այնուամենայնիվ կան սխալներ, որոնք մարդիկ թույլ են տալիս՝ գրիպով հիվանդանալուց հետո: Ըստ նրա, սխալ է տարածված այն կարծիքը, թե գրիպով հիվանդին տրվող թեյի մեջ օղի կամ կոնյակ ավելացնելը կբարելավի նրա վիճակը. «Օղին, կոնյակը, ընդհարապես՝ ալկոհոլը մարմնից հեղուկը հեռացնելու հատկություն ունեն, իսկ գրիպով հիվանդի մարմնից հեղուկի պակասումը՝ օրգանիզմի ջրազրկումը ծանր հետևանքներ է ունենում»,-ասաց Րաֆֆի Փոլադյանը, նշելով նաև, որ բժշկի՝ շատ հեղուկներ ընդունելու ցուցմունքի անվան տակ մարդիկ հաճախ են խմում կոկա-կոլա, սուրճ, թունդ թեյ և միզամուղ ըմպելիքներ, որոնք նույնպես հակացուցված են գրիպով հիվանդներին: Ըստ նրա՝ սուր շնչառական վարակներով հիվանդները պետք է խմեն միայն բնական ըմպելիքներ, որոնք միզամուղ հատկություններ չունեն:
«Արևելքի» հետ զրույցում Րաֆֆի Փոլադյանը նաև կարևորեց գրիպի դեմ պատվաստումների անհրաժեշտությունը, սակայն նշեց, որ խստիվ արգելված է պատվաստում կատարել արդեն վարակված ժամանակ: «Պատվաստման դիմողը պետք է ամբողջությամբ վստահ լինի, որ ինքը վարակակիր չէ, այնուհետև կատարի պատվաստումը, հակառակ դեպքում՝ լրիվ հակառակ արդյունքը կունենա»: Նա նշեց, որ պատվաստումները կարևոր են հատկապես բուժաշխատողների, մանկապարտեզների, տարրական դպրոցների աշխատողների համար:
