20.09c
Երեվան
ուրբ, ապր 19
Այսօր Ծիծեռնակաբերդի հուշահամալիրի «Հիշողության պուրակ»-ում եղեւնի տնկվեց, որի նախաձեռնողը Մարդկային ռեսուրսների զարգացման «Փյունիկ» հիմնադրամն է: Տնկված եղեւնու կողքին տեղադրվեց ցուցատախտակ, առ այն, որ հիշատակի ծառը Եղեռնի զոհերի հիշատակին տնկվել է «Փյունիկ» հիմնադրամի համանախագահներ Գաբրիել Չեմբերջյանի եւ Լեւոն Սարգսյանի կողմից: Ծառատնկման արարողությանը ներկա էին նախարարներ, հյուրեր սփյուռքից, մշակութային, կրթական կառույցների ղեկավարներ:
«Արեւելք»-ի հետ զրույցում Մարդկային ռեսուրսների զարգացման «Փյունիկ» հիմնադրամի համանախագահ Գաբրիել Չեմբերջյանը նշեց, որ սա հիմնադրամի միակ նախաձեռնությունը չէ, որ առնչվում է Ցեղասպանության զոհերի հիշատակին: Հիմնադրամը բազում ծրագրեր է իրականացնել, որոնցից մեկն էլ մասնակցությունն է Ցեղասպանության զոհերի թանգարան-ինստիտուտի վերանորոգմանը: «Ուրախ ենք, որ հայտնի գործիչների տնկած ծառերի կողքին լինելու է նաեւ մեր հիմնադրամի տնկած եղեւնին»,-ասաց Գաբրիել Չեմբերջյանը, հավաստիացնելով, որ հիմնադրամը շարունակելու է կրթական, մշակութային, ազգային եւ զարգացման այլ ծրագրերին ցուցաբերվող իր աջակցությունը:
Արարողությանը ներկա ԿԳ նախարար Լեւոն Մկրտչյանը, մեզ հետ զրույցում անդրադառնալով հայաստանյան դպրոցներում հայոց ցեղասպանության դասավանդման թեմային, ասաց, որ հայոց ցեղասպանության թեման այնպես թե այնպես դասավանդվում է դպրոցներում, հարցը վերաբերվում է ուսումնա-օժանդակ նյութերին, որը պարտավոր ենք ունենալ:
Մշակույթի նախարար Արմեն Ամիրյանն էլ մեկ անգամ եւս հիշեցրեց ապրիլի 24-ի ամենամեծ միջոցառման՝ Համահայկական Սիմֆոնիկ նվագախմբի համերգի մասին, որը համախմբել է հայ երաժիշտներ՝ աշխարհի տարբեր երկրներից: Օպերայի եւ Բալետի Ակադեմիական թատրոնում տեղի ունենալիք համերգը հեռարձակվելու է նաեւ հեռուստատեսությամբ: Ինչպես նշեց Արմեն Ամիրյանը, աշխարհի 20 երկրներից ծագումով հայ 46 երաժիշտներ, որոնք միացել են նաեւ մեր երաժիշտները, հավաքվելու են Հայաստանում եւ միասնական համերգ են ունենալու, որը ղեկավարելու է հինգ հայ դիրիժոր:
