image
Հրատապ լուրեր:

Ազգային ու մարդկային նկարագիր չունեցող հանրային տականքը գլուխ է բարձրացրել.ՀՅԴ Բիւրոյի յայտարարութիւնը

Ազգային ու մարդկային նկարագիր չունեցող հանրային տականքը գլուխ է բարձրացրել.ՀՅԴ Բիւրոյի յայտարարութիւնը

Ամիսներ շարունակ Դաշնակցութիւնը ահազանգում էր, որ երկրում սերմանուող ու խրախուսուող քաղաքական անհանդուրժողականութիւնն անխուսափելիօրէն հանգեցնելու է պառակտումների ու ատելութեան։ Ցաւօք, դա այլևս իրողութիւն է։ Ժողովրդի տարբեր հատուածներին իրար դէմ լարելու, հասարակութիւնը «սեւերի» ու «սպիտակների», իւրայինների ու թշնամիների բաժանելու իշխանութիւնների քաղաքականութիւնն արդէն գործնական դրսեւորումներ է ստանում։

ՀՅԴ Բիւրոյի բազմամեայ ներկայացուցիչ, Արցախեան ազատամարտի կազմակերպիչներից Հրանդ Մարգարեանն իր մանկահասակ թոռների հետ Ազատութեան հրապարակում զբոսնելիս յարձակման է ենթարկուել մոլագար ամբոխի կողմից։
Անհանդուրժողականութիւն ու թշնամանք տարածելու իշխանութեան անպատասխանատու, ակրեսիվ կոչերն ու ատելութեան խօսքն այլևս հանրային վարքագիծ է դարձել։ Փողոցային խուժանն արդէն իշխանութիւնների կարգախօսները դարձրել է իր վարքի կանոն։

Ազգային ու մարդկային նկարագիր չունեցող հանրային տականքը գլուխ է բարձրացրել եւ փորձում է իր կամքն ու ստոր արժէքները պարտադրել։ Ամիսներ շարունակ լրատուամիջոցներով ու հանրային հարթակներում Դաշնակցութեան առանձին գործիչների ու կուսակցութեան դէմ իրականացուել է կազմակերպուած, ուղղորդուած ու հովանաւորուող հակաքարոզչութիւն, սերմանուել է թշնամանք ու ատելութիւն։

Հրանդ Մարգարեանին ու Դաշնակցութեան ուղղուած անբարոյ յայտարարութիւնները, սպառնալիքներն ու ամբոխի յարձակումը մենք գնահատում ենք որպէս յստակ ուղղորդուած գործողութիւն և ստոր քայլ Դաշնակցութեան համահայկական ողջ ընտանիքի դէմ։ Յանուն հասարակական համերաշխութեան շատ դէպքերում ենք լռել։ Թերևս մեր լռութիւնն ու համարժէք քայլերով չպատասխանելը ոմանց մօտ ստեղծել է անպատիժ մնալու թիւր մտայնութիւն։ Այլևս չենք հանդուրժելու, քանզի հայ մարդուն ոչ վայել վարքագծով ակրեսիւ փողոցային խուժանը հասարակութիւն չէ։

Պահանջում ենք երկրի իշխանութիւններից և իրաւապահ մարմիններից ամենակարճ ժամկէտում գնահատական տալ կատարուածին, օրէնքի ողջ խստութեամբ պատժել մեղաւորներին և ընդմիշտ վերջ տալ նման գործելաոճին։

ՀՅԴ Բիւրօ
19 Մայիս, 2019 թ.