image

Նախագահ Սարգսեան պիտի չստորագրէ սահմանադրական օրէնսգիրքին փոփոխութիւններու օրէնքը

Նախագահ Սարգսեան պիտի չստորագրէ սահմանադրական օրէնսգիրքին փոփոխութիւններու օրէնքը

Հայաստանի Հանրապետութեան նախագահը պիտի չստորագրէ Ընտրական օրէնսգիրքին փոփոխութիւններու Օրէնքը, բայց եւ պիտի չդիմէ Սահմանադրական դատարան՝ անոր Սահմանադրութեան համապատասխանութիւնը որոշելու համար: Այս մասին յայտարարութիւն տարածած է ՀՀ նախագահ՝ Արմէն Սարգսեան:

«Հայաստանի Հանրապետութեան ընտրական օրէնսգիրք» սահմանադրական օրէնքում փոփոխութիւններ եւ լրացումներ կատարելու մասին» օրէնքը Ազգային ժողովի կողմից Հանրապետութեան նախագահի ստորագրմանն է ներկայացուել 2021 թուականի ապրիլի 2-ին:

Հանրապետութեան նախագահն Օրէնքը քննարկել է մի շարք կուսակցութիւնների ղեկավարների, քաղաքական գործիչների, կեդրոնական ընտրական յանձնաժողովի ներկայացուցչի հետ, լսել նրանց կարծիքներն ու դիտարկումները:

Օրէնքի վերաբերեալ Հանրապետութեան նախագահի աշխատակազմի ուսումնասիրութիւնները յանգեցրել են այն եզրակացութեան, որ սահմանադրականութեան տեսանկիւնից Օրէնքն առերեւոյթ խնդրայարոյց չէ:

Միեւնոյն ժամանակ, Օրէնքի վերաբերեալ Հանրապետութեան նախագահն ունի հետեւեալ սկզբունքային դիտարկումները՝

Օրէնքն ընդունուել է Ազգային ժողովի միայն քաղաքական մեծամասնութեան քուէարկութեան արդիւնքում:

Հանրապետութեան նախագահը բազմիցս նշել է, որ ճգնաժամը յաղթահարելուն ուղղուած արտահերթ ընտրութիւնները կազմակերպելուն պէտք է նախորդի Սահմանադրութեան, ինչպէս նաեւ Ընտրական օրէնսգրքի համապարփակ փոփոխութիւնների գործընթացը, որը պահանջում է ողջամիտ ժամկէտ եւ, ժողովրդավարութեան սկզբունքներին համաձայն, պէտք է իրականացուի լայն հանրային, հասարակական, քաղաքական քննարկումների արդիւնքում ձեւաւորուած կարծիքները լսելով եւ հաշուի առնելով: Ընտրակարգին առնչուող կարգաւորումները պէտք է միտուած լինեն ընտրողների շահերը լաւագոյնս ներկայացնելու տրամաբանութեամբ Ազգային ժողով ձեւաւորելուն:

Վենետիկի յանձնաժողովի մօտեցմամբ ընտրական օրէնսդրութեան փոփոխութիւնները պէտք է տեղի ունենան առնուազն ընտրութիւններից մէկ տարի առաջ: Վենետիկի յանձնաժողովն արտայայտել է նաեւ իր դիրքորոշումն այն մասին, որ ընտրական համակարգի կայունութիւնը կարեւորագոյն սկզբունքներից է, կարեւոր է նաեւ ունենալ բաւարար ժամանակ ընտրական օրէնսգրքի փոփոխութիւնների վերաբերեալ խորքային եւ բոլոր շահագրգիռ անձանց մասնակցութեամբ հանրային քննարկումներ իրականացնելու համար:

Օրէնքով մէկ տեսակի համամասնական ընտրակարգը փոխարինւում է մէկ այլ տեսակի համամասնական ընտրակարգով: Մասնաւորապէս, բացառւում է տարածքային ընտրական ցուցակներով ընտրութիւններին մասնակցելու գործող կառուցակարգը:

Առանց տարածքային ցուցակների կառուցակարգի համամասնական ընտրակարգը կարող է արդիւնաւէտ լինել խորհրդարանական կայացած քաղաքական մշակոյթ ձեւաւորած պետութիւններում, որտեղ կուսակցութիւններն ունեն յստակ ծրագիր, որտեղ հասարակութիւնն ունի հնարաւորութիւն եւ բաւարար ժամանակ ծրագրերին ծանօթանալու, որտեղ ընտրութիւնն իրականցւում է ներկայացուած ծրագրերի հիման վրայ: Մինչդեռ նման փոփոխութիւնը Հայաստանի Հանրապետութիւնում առկայ իրավիճակում կարող է յանգեցնել ոչ թէ կուսակցութիւնների եւ դրանց ծրագրերի, այլ այս կամ այն կուսակցութիւնը գլխաւորող անձանց միջեւ մրցակցութեան:

Հաշուի առնելով վերոգրեալը՝ Հանրապետութեան նախագահը չի ստորագրելու Օրէնքը, բայց եւ չի դիմելու Սահմանադրական դատարան՝ դրա Սահմանադրութեանը համապատասխանութիւնը որոշելու համար»: