Լիբանանի Արտաքին գործոց նախարար Ժըպրան Պասիլ, երէկ, միացեալ մամլոյ ասուլիս մը տուած է Արաբական լիկայի առաջին քարտուղար Ահմատ Ապու Ալ-Ղայզին հետ:
Այս մասին տեղեկութիւնը կը հաղորդէ «Ալ-Ժատիտ» լրատուական կայանը:
Աղբիւրը նաեւ կը նշէ, որ Պասիլ դրական համարած է Լիբանանի մէջ տեղի ունեցած համաարաբական տնտեսական ֆորումը եւ նշած է, որ այս ժողովը մեծ կարեւորութիւն ունէր բոլոր արաբներուն համար:
Ան նաեւ կոչ ըրած է արաբական տէրութիւններուն եւ ամբողջ աշխարհին՝ զօրավիգ կանգնիլ սուրիացի փախստականներուն, նուազեցնելու համար անոնց տառապանքները:
Պասիլ նաեւ ըսած է, որ շատեր դրական արտայայտուեցան Սուրիոյ՝ Արաբական Լիկա վերադառնալու խնդրին շուրջ, շեշտելով սակայն, որ յատկապէս այս հանգրուանին, այդ օրակարգի վերաբերեալ որեւէ նորութիւն կամ բանակցութիւն տեղի չունենար:
Յիշեցնենք, որ Պէյրութի մէջ երէկ տեղի ունեցած միօրեայ արաբական գագաթնաժողովին մասնակցեցան միայն երկու տէրութիւններու ղեկավարներ եւ անոնք են՝ Մորիթանիոյ, ինչպէս նաեւ Քաթարի իշխանը:
Մինչ կը սպասուէր, որ քսանէ աւելի ներկայացուցիչներ ներկայանային այս ժողովոին, սակայն մետասաներորդ պահուն, առկայ կարգ մը դժուարութիւններու, ինչպէս նաեւ տարակարծութիւններու պատճառով արաբ ղեկավարները նախընտրեցին չներկայանալ այս ժողովին:
Ժողովին նաեւ ստեղծուեցաւ յատուկ սնտուկ մը, որուն հիմնական նպատակն է օժանդակութիւն տրամադրել սուրիացի գաղթականներուն: