Լիպիայի մայրաքաղաքի մօտակայքը իշխանամէտ ուժերու եւ Լիպիոյ ազգային բանակի միջեւ մարտական գործողութիւնները բռնկած են նոր ուժով, կը հաղորդէ BBC-ն:
Խաֆթարի զօրքերը յարձակում գործած են քաղաքի վրայ երեք ուղղութիւններով. մարտեր կ'ընթանան մայրաքաղաքէն արեւելք՝ Թաճուրա շրջանին մէջ, արեւմուտքը գտնուող Ճանզուր շրջանին մէջ եւ հարաւը՝ Պըն-Հաշիր շրջանին մէջ, ուր տեղակայուած է Թրիփոլի օդակայանը:
Այդ օդակայանը գործող չէ, այդ իսկ պատճառով ռազմավարական կարեւորութիւն չի ներկայացներ. ներկայիս բոլոր օդային թռիչքները կ'իրականացուին «Միթիկա» օդակայանէն, որ տեղակայուած է քաղաքի արուարձանին մէջ՝ կեդրոնէն շուրջ 10 քմ դէպի արեւելք, եւ այդտեղ ուղղուած է Խաֆթարի խմբաւորման աջ թեւի հարուածը:
Միւս կարեւոր կէտերը որոնք Խաֆթարը կը ձգտի գրաւել՝ ազգային բանկն է եւ պետական հեռուստակեդրոնը:
Որոշ ականատեսներու հաղորդմամբ՝ Լիպիոյ ազգային բանակի զինուորները նկատուած են քաղաքի կեդրոնէն շուրջ 15 քմ հեռաւորութեան վրայ:
Վարչապետ Ֆաիզ Սարաճ իր հեռուստաուղերձին մէջ մեղադրած է զօրավար Խաֆթարը դաւաճանութեան եւ պետական յեղաշրջում կազմակերպելու մէջ:
Ան յայտարարած է, որ իր կառավարութիւնը «ձեռք մեկնած է՝ ի նպաստ խաղաղութեան», սակայն այժմ Խաֆթարը պիտի բախուի միայն «ուժի եւ հաստատակամութեան հետ»: