27.09c
Երեվան
ուրբ, ապր 19
Լիբանանի կառավարութեան 2019 թուականի պիւտճէի քննարկումները կ'անցնին երկիրը հարուածող գործադուլներու բոհին մէջ: Այս մասին տեղեկութիւնը կը հաղորդէ VDL կայանը:
Աղբիւրը նաեւ կը նշէ, որ այս առաւօտ Լիբանանի բջիջային հեռախօսակապի երկու հիմնական ընկերութիւններու պաշտօնեաները յայտարարութիւններ կատարած են, որ կը պատրաստուին իրենք եւս մասնակցիլ երկրին մէջ ընթացող գործադուլներուն:
Նշենք, որ աւելի վաղ երկրի հանրային ոլորտի ծառայութեան տարբեր պաշտօնեաներ նոյնպէս գործադուլի դիմելով իրենց բողոքը յայտնած էին կառավարութեան կողմէ իրենց ամսավճարներուն վրայ կիրառուելիք պահումներուն առընթեր:
Կը նշուի նաեւ, որ կառավարութիւնը այդ քայլերուն կը դիմէ մասնաւորապէս հաւասարակշռելու համար երկրի պիւտճէն եւ՝ առկայ նիւթական բացերը համալրելու:
Յիշեցնենք, որ մէկէ աւելի աղբիւրներ կը խօսին, որ վարչապետ Սաատ Հարիրիի կառավարութիւնը պարտաւոր է այդ բարեկարգումները եւ կրճատումները կատարել, գոհացնելու համար եւրոպական շրջանակները, որոնք կը պատրաստուին մեծ պայմանաւորեալ դրամաշնորհ մը յատկացնել Լիբանանին:
