Լուսանկարում «Հայ-սիրիական ամերիկյան նպաստամատույց»-ի կոմիտեի դրամահավաք նախաձեռնությունն է ամերիկյան Սիեթլ քաղաքում` հօգուտ սովյալ հայերի: Ամերիկան խորհրդանշող Քեռի Սեմին, Մայր Հայաստանը և երկու հայ որբերին ներկայացնող հերոսները, շրջելով քաղաքի փողոցներում, ամերիկացիներին կոչ էին անում մասնակցելու հանգանակություններին: Մեքենայի վրա փակցված է պաստառ՝ «Սովյալ Հայաստան. օգնե՛ք կարիքավոր երեխաներին... Քեռի Սեմն օգնության ձեռք է մեկնում այսօր: Սիեթլը կատարում է իր պարտքը» գրությամբ (1917 թ.):
ԱՄՆ դեսպան Հենրի Մորգենթաուի նախաձեռնությամբ 1915 թվականին Օսմանյան կայսրությունում ստեղծված Հայ-սիրիական նպաստամատույցի ամերիկյան կոմիտեն ԱՄՆ տարբեր քաղաքներում հաճախ կազմակերպում էր շրջիկ ցուցադրություններ, որոնց նպատակն էր ամերիկյան հասարակությանը տեղեկացնել հայ ժողովրդի անլուր տառապանքների մասին և կոչ անել մասնակցելու նրանց օգնելու համար կազմակերպվող հանգանակություններին: Իր գոյության 15 տարվա ընթացքում (1915-1930 թթ.) Նպաստամատույցը հանգանակությունների և դրամահավաք աշխատանքների միջոցով մոտ 117.000.000 ԱՄՆ դոլարի օգնություն ցուցաբերեց Մերձավոր Արևելքի գաղթականներին (այդ թվում՝ նաև հայ)՝ նրանց ապահովելով կացարանով և սննդով:
«Հաշվի առնելով հրատապ օգնության անհրաժեշտությունը` Միացյալ Նահանգների ժողովրդին կրկին կոչ եմ անում շարունակելու հանգանակությունները, որքան իրենք են անհրաժեշտ համարում` իրենց խղճի և առատաձեռնությանը համապատասխան, այս տառապյալ ժողովուրդներին օգնելու համար»:
ԱՄՆ Նախագահ Վուդրո Վիլսոնի` ամերիկացի ժողովրդին ուղղված կոչից
հոկտեմբերի 29, 1917 թ.
Լուսանկարի աղբյուրը՝ Armenia. The World Spells Tragedy, New York, 1917.
«100 ԼՈՒՍԱՆԿԱՐՉԱԿԱՆ ՊԱՏՄՈՒՅԹՈՒՆՆԵՐ ՀԱՅՈՑ ՑԵՂԱՍՊԱՆՈՒԹՅԱՆ ՄԱՍԻՆ» գրքից