Քիչ առաջ Ջո Բայդենը երդմամբ ստանձնեց Ամերիկայի Միացյալ Նահագների նախագահի լիազորությունները:
Պաշտոնական արարողությունն ընթանում է Վաշինգտոնում՝ Կապիտոլիումում, որտեղ գտնվում են օրենսդիր իշխանության երկու պալատները՝ Սենատը և Ներկայացուցիչների տունը:
Լրատվամիջոցները նշում են, որ Ջո Բայդենը կրել է ամերիկացի դիզայներ Ռալֆ Լորենի ստեղծած կոստյումը, իսկ նրա կինը՝ ԱՄՆ առաջին տիկին Ջիլ Բայդենը, կրել է «Մարգարյան» պիտակով օվկիանոսի կապույտի երանգով վերարկու, որ ստեղծել է երիտասարդ դիզայներ Ալեքսանդրա Օ'Նիլը: Վերջինս Markarian ապրանքանիշը հիմնել է Նյու Յորքում, 2017-ին, ոգեշնչվելով իր տատիկից, որ Ալեքսանդրային փոքր ժամանակ կարել է սովորեցրել:
Նա իր ապրանքանիշը «Մարգարյան» է կոչել Մարգարյանի գալակտիկաների անունով, որի լայնածավալ սպեկտրը հայտնի է ամբողջ աշխարհում: Այն կոչվում է հայ աստղագետ Բենիամին Մարգարյանի անունով: Մարգարյանն ու նրա գործընկերներն են հայտնաբերել գերմանուշակագույն ավելցուկով 1500 գալակտիկա, որոնք ուսումնասիրվում են աշխարհի բազմաթիվ աստղադիտարաններում:
Ավելի ուշ դիզայներ Ալեքսանդրա Օ'Նիլը հայտարարել է, որ կապույտ գույնն ընտրել է իբրեւ վստահության եւ կայունության խորհրդանիշ:
Ամերիկյան նախագահական պատմության ավանդույթի համաձայն Ջիլ Բայդենի հագուստը փոխանցվելու է Սմիսթոնյան գիտահետազոտական ինստիտուտի գլխավոր թանգարանին: