Այս կիրակի ժամանակն է
Որ անգամ մը դէպի երկինք սլանանք ,
Բացասական մասնիկները ամպերուն տանք,
Երթանք հասնինք մինչեւ Արեւ,
Դրական լիցք հաւաքենք ,
Յետոյ դարձեալ
Մենք մեր հողին վերադառնանք:
Այս կիրակի, Տարին նախքան լրանայ ,
Ժամանակը նախքան անցնի, երթայ,
Նախքան մեր մազերուն
Ճերմակ գոյնը բազմանայ ,
Այս կիրակի երկու ձեռքով
Ժամանակը եկէք բռնենք ,
Ափերուն մէջ
Մենք մեր կեանքը եկէք կշռենք,
Լաւ մը զտենք , յետոյ նորէն
ժամանակին խորքը նետենք ...
Այս կիրակի մենք մեր կեանքը եկէք կշռենք ,
Կրցածնիս չափ լաւ մը զտենք,
Անոր մէջէն
Ծանրութիւնը եկէք հանենք,
Բացասական ամբողջ լիցքը
Ամպերուն մէջ եկէք պարպենք ,
Ինչ որ արժէք ունինք մեր մէջ
Ու դրական ամբողջ լիցքը
Իրարու հետ փոխանակենք :
Այս կիրակի , եկէք խմենք շիշ մը գինի
Ու գինովցած դէպի երկինք սլանանք,
Հովերուն հետ հեռու երթանք,
Ամպրոպներուն միանանք,
Հոն մասակցինք տիեզերքի գինարբուքին,
Բացասական մեր լիցքերը
Յանձնենք հովին , փոթորիկին:
Այս Կիրակի , գալ կիրակի
Ու ասկէ ետք
Եկող ամէն մէկ Կիրակի,
Պիտի երկինք սլանանք,
Բացասական մասնիկները ամպերուն տանք ,
Յետոյ հասնինք մինչեւ Արեւ
Դրական Լիցք հաւաքենք
Ու նոր թափով
Մենք մեր կեանքը շարունակենք:
Խաժակ
12/17/2017 Այնճար