Այս առաւօտ «Արեւելք», յղում տալով լիբանանեան աղբիւրներու, լուր մը տուած է Պէյրութի մէջ հնչած կրակոցներու մասին: Աւելի ուշ պարզ դարձած են դէպքին հանգամանքները եւ ըստ ներկայացուցած լրատուութեան, պատանի մըն է կրակոցներուն հեղինակը: Ըստ LBCI կայանին, 14-ամեայ պատանի մը վէճի բռնուած է իր հօր հետ, որմէ ետք կրակած ու տեղն ու տեղը սպաննած զինք: Աւելի վերջ պատանին կրակ բացած է իրենց շէնքի սուրիացի պահակին վրայ ու նոյնպէս սպաննած է խնդրին հետ կապ չունեցող մարդը: Վերջապէս ան փողոց դուրս գալով կրակ բացած է անցորդներու վրայ, նոյնպէս սպաննելով մէկ անձ եւ պատճառ դառնալով երեք անձերու վիրաւորման:
Աղբիւրը կը նշէ, որ պատանին օգտագործած է տան մէջ եղող «Բոմբ Աքշըն» տիպի հրացան մը: Կան տեղեկութիւններ, որ եղած են ընտանեկան վէճեր եւ ընտանիքը կ'ապրէր անհանգիստ վիճակ մը:
Յիշեցնենք, որ դէպքը տեղի ունեցած է արեւմտեան Պէյրութի «Զոքաք ալ պլաթ» թաղամասին մէջ, որ մօտիկ անցեալին կը համարուէր հայահոծ թաղամաս մը: