Հալէպահայ Անի Պալըխեան յատուկ միջոցառման մը ընթացքին այսօր արժանացաւ ՄԱԿ-ի կողմէ սահմանուած Universal Rights Award-ի Woman of Courage Award մրցանակին:
Նշենք, որ ՄԱԿ-ի կողմէ սահմանուած այս մրցանակի գործընկերներն են Եւրոպական Միութիւնը եւ Հայաստանի մէջ գործող Գերմանիոյ, Մեծն Բրիտանիոյ եւ Միացեալ Նահանգներու դեսպանատուները:
Այս մասին «Արեւելք» տեղեկութիւն ստացաւ մեծարեալին հարազատներէն: «Խիզախ Կին» մրցանակը յանձնուած է UNHCR-ի երեւանեան գրասենեակի տնօրէնին կողմէ: Ներկայ եղած են Պալըխեան ընտանիքի անդամները եւ «Հալէպ» կազմակերպութեան պատասխանատուներէն ներկայացուցիչներ:
Մեր ընթերցողներուն յիշեցնենք, որ Անի Պալըխեան նախագահն է սուրիահայերու օգնութեան հարցերով զբաղուող եւ կարեւոր գործունէութիւն ծաւալող «Հալէպ» կազմակերպութեան:
«Արեւելք» այս առթիւ կը կիսէ «Հալէպ» կազմակերպութեան, ինչպէս նաեւ Պալըխեաններու ուրախութիւնը՝ մաղթելով տիկին Անիին արեւշատութիւն եւ նորանոր նուաճումներ իր ազգանուէր գործունէութեան մէջ: