Այսօր Հալէպի մէջ կ'իրականացին ՏԻՄ ընտրութիւններ: Ըստ օրէնսդրութեան՝ քաղաքացիները պէտք է իրենց ընտրութիւնը կատարեն երկու ընտրակարգով՝ ընտրելով միաժամանակ նահանգային եւ քաղաքային մարմիններ:
Ինչպէս արդէն յայտնած է «Արեւելք»-ը, Հալէպի ՏԻՄ ընտրութիւններուն առաջադրուած է 6 սուրիահայերու թեկնածութիւն, որոնք, սակայն, ոչ միասնական ձեւով հանդէս կու գան: Մէկ մասը կը մասնակցի անհատական, երկու թեկնածուն՝ Բերիոյ թեմի առաջադրմամբ:
Ընտրութիւններէն սպասելիքներու ու յառաջիկայ ընելիքներու մասին «Արեւելք»-ը զրուցեց Սուրիոյ խորհրդարանի պատգամաւոր, Բերիոյ թեմի ներկայացուցիչ Ժիրայր Ռէիսեանին հետ:
Սուրիան բոլորին հայրենիքն է, այդ շարքին նաեւ անոնց, որոնք երկար տարիներ ապրած ու օգտուած են այս երկրի բարիքներէն, ուրեմն առանձնացնել հայ թեկնածուները միւսներէն Ժիրայր Ռէիսեանը տեղին չի համարեր: Կ'ըսէ.
«Ես չեմ առանձնացներ հայը արաբէն կամ մէկ ուրիշէն, ընդհանուր աշխուժութիւն կայ, ընդհանուր ոգեւորութիւն կայ, եռուզեռ կայ, եւ իւրաքանչիւրն իր ընելիքը կ'ընէ այսօր ընտրուելու, վաղն ալ իր բաժինը բերելու երկրի կառուցման»:
Առաւել եւս չուզեր տարանջատել հայ թեկնածուները, հետեւաբար կը հրաժարի անդրադառնալ հարցին, թէ ինչու առանձին հանդէս կու գան 6 հայ թեկնածուները: Հայն ամբողջ սուրիացի ժողովուրդին մէկ մասնիկն է, եւ ինչ որ ունի Սուրիան, բոլորինն է, կը կարծէ ան:
Իսկ Սուրիան կ'երթայ դէպի զարգացում, դէպի վերակառուցում, հետեւաբար թեկնածուներու ծրագրերն ալ այդ ուղղութեամբ են, ինչը ոգեւորած է հայ պատգամաւորին, մտահոգութիւններու մասին չի ցանկար խօսիլ:
«Այսօր Սուրիան իր յաղթական ընթացքին մէջ է, երկիրն իր վերակառուցման ընթացքը գտնելու մէջ է, իւրաքանչիւր անհատ, քաղաքացի ունի իր բաժինը, պարտականութիւնը եւ պիտի ունենայ իր ներդրումը երկրի վերաբնակեցման գործընթացին մէջ: Ինչո՞ւ կը մտածէք մտահոգութեան մասին, երբ մարդիկ գործի ու արդիւնքի մասին կը մտածեն, մենք կը սպասենք, որ այսօր ով որ յաջողութեան հասնի, պէտք է համապատասխան արդիւնքը բերէ»,-կ'ըսէ Ռէիսեան:
Ան վստահ է, որ Սուրիան ոտքի պիտի կանգնի, իսկ դրականի ձգողական ուժն աւելի մեծ է, ուստի կը սպասէ, որ զարգացող երկիրն իր մօտ վերադարձնէ զաւակները, Հալէպն ալ նոր ղեկավարներու ջանքերով վերակագնուի: «Վերականգնումը իր լայն իմաստով ոչ միայն քարն է, այլեւ ընկերութիւնն է, այլեւ այն բոլոր բաժիններն են, որոնք այս երկիրն ու ժողովուրդը որպէս մէկ ամբողջութիւն կը ներկայացնեն»,-կը կարծէ սուրիահայ պատգամաւորը: