Եթէ այստեղ աշխատանքի պայմաններ ըլլան, ես վստահ եմ, որ մարդիկ կը վերադառնան. Տալիթա Քահքէյեան
Տալիթա Քահքէյեան Սուրիայէն Հայաստան հաստատուած է ամուսինին հետ 2014 թուականին: Arevelk.am կայքին ան պատմեց, որ այստեղ կը պատրաստէ արեւելեան խմորեղէն, սուրիական զարդեր, եւ Նալպանտեանի փողոցի վրայ գտնուող առեւտուրի կէտին մէջ կը վաճառէ անոնք: «Հայաստանի մէջ գտնուելուս չորս տարիներուն ընթացքին ես տարբեր միջոցառումներու մասնակցած եմ, եւ հիմա մեր գործը քիչ-քիչ արդէն առաջ կ'երթայ»-ըսած է ան:
Ան նշած է, որ ամուսինը հիւանդ է եւ չի կրնար աշխատել, իսկ Կարմիր խաչը այս անգամ մերժած է օգնութիւն տրամադրել: «Երբ նոր եկած էինք, Կարմիր Խաչէն օգնութիւն ստացանք, սակայն այս անգամ չենք գիտեր, թէ ինչ պատճառով մերժուած ենք եւ գիտեմ, որ շատ սուրիահայերու մերժած են: Տանը միայն ես կ'աշխատիմ, իսկ ամուսինս դեղորայքի խնդիր ունի, տան վարձը կը դժուարանանք տալ»,-ըսած է ան:
Ան պատմեց, որ Սուրիոյ մէջ իրենց եօթ հոգինաոց ընտանիքէն միայն ամուսինը կ'աշխատէր եւ բոլորին կը պահէր: Ան նշեց, որ հիմա երեխաները մնացած են Սուրիա, եւ իրենք ամուսիններով Հայաստան եկած էին երկու ամսուան համար, սակայն հաշուի առնելով, որ Սուրիոյ մէջ վիճակը աւելի վատացած է, ստիպուած մնացած են: Երեխաները եւս արդէն կը մտածեն գալ Հայաստան:
«Մենք այստեղէն այլ տեղ երթալու միտք չունինք, այստեղ վարժուեցանք: Ընդհանրապէս պատերազմի հետեւանքով երկրէ երկիր տեղափոխուիլը հեշտ չէ, մենք ինչ ունինք թողեցինք Սուրիա: Ես յոյս չունիմ, որ Սուրիան այլեւս կը շտկուի , արդէն քանի տարի է պատերազմը կը շարունակուի»,-ըսած է ան:
Տալիթան հիմնական խնդիրը համարեց տուն չունենալու հարցը: «Միայն տան հարցը կ'անհանգստացնէ: Քանի մը ամիս կը մնաս, յետոյ տանտէրը կամ կը հանէ, կամ վարձը կ'աւելցէ, արդէն հինգ տուն տեղափոխուած ենք»,-ըսած է ան:
Սուրիահայը նշած է, որ շատ սուրիահայ ծանօթներ ունի, որոնք Հայաստանէն հեռացած են աշխատանքի բացակայութեան պատճառով: Ան նկատած է, որ հայաստանցիները եւս խնդիր ունին աշխատանքի եւ սա բոլորի խնդիրն է, ուստի անհրաժեշտ է աջակցութիւն տրամադրել, գործարաններ բանալ, որ մարդիկ աշխատին:
«Հայաստանի միակ խնդիրը այս է, այլապէս Հայաստանը շատ լաւ երկիր է, թէ՛ ապահովութեան առումով, թէ՛ ալ մարդկային յարաբերութիւններու առումով։ Եթէ այստեղ գործ ըլլայ, ես վստահ եմ, որ մարդիկ կը վերադառնան` Ամերիկայէն ալ, Գանատայէն ալ, Եւրոպայէն եւ ամէն տեղէ ալ»,-ըսած է ան: