27.09c
Երեվան
ուրբ, ապր 19
ՍԴ Հնչակեան Կուսակցութեան Կենտրոնական Վարչութիւնը իր խոր մտահոգութիւնն է արձանագրում Հայաստանում կորոնավիրուսի վարակվածութեան ու մահացութեան վտանգաւոր աճի կապակցութեամբ, ինչն արդէն առողջապահական խնդրից սպառնում է վերածուել ազգային անվտանգութեան հարցի:
Անշուշտ, ինչպէս ամբողջ աշխարհում՝ Հայաստանում եւս այս աննախադէպ համաճարակը առաջացրել է հանրային ու տնտեսական ծանր ճգնաժամ: Հազարաւոր մարդիկ կորցրել են իրենց աշխատանքը, սպառել իրենց վերջին նիւթական միջոցներն ու յայտնուել աղքատութեան ու նոյնիսկ սովահարությեան շեմին: Միւս կողմից, բազմաթիւ անպատասխանատու քաղաքացիներ, չպահպանելով համաճարակի կանխարգելմանն ուղղուած անվտանգութեան կանոնները, վարակում եւ վարակւում են՝ առաւելագոյնս ծանրաբեռնելով արդէն իսկ ծայր աստիճան գերբեռնված առողջապահական համակարգը:
Ի տես այս բոլորի, երբ այս անտեսանելի թշնամու դէմ պայքարը պահանջում է միասնական ուժերի գերլարում, քաղաքացիական բարձր գիտակցութիւն ու կարգապահութիւն, այսօր մենք ականատես ենք լինում քաղաքական պատեհապաշտությեան գերագոյն դրսեւորման, երբ ընդդիմադիր կուսակցութիւնները՝ ներկայ իշխանութիւններին օգնութեան ձեռք մեկնելու փոխարէն, միանում են նախկին վարկաբեկուած իշխանութեան ներկայացուցիչներին ու կառավարութեան հրաժարականն են պահանջում: Այսօր, երբ համաճարակի կասեցումը պէտք է լինի միակ հրամայականը, նման պահանջը խիստ անպատեհ է ու անընդունելի: Ի հարկէ, սա չի նշանակում, որ կառավարութեան կողմից համաճարակի դէմ պայքարի գծով առնուած քայլերն ու որոշումները անթերի են: Վերջիվերջոյ, այդ պայքարի արդիւնաւէտութեան ու համարժէքությեան գլխաւոր պատասխանատուն ներկայ կառավարութիւնն է եւ պիտի հաշուետու լինի քաղաքացու առաջ, բայց միանշանակ ոչ այս պահին:
Ուստի, ելնելով վերոնշեալից, ՍԴ Հնչակեան կուսակցութեան Կեդրոնական Վարչութիւնը կոչ է անում մեր հայրենակիցներին խստիւ պահպանել կանխարգելման բոլոր կանոնները, իսկ կուսակցութիւններին՝ մի կողմ թողնել ամէն տեսակի տարակարծութիւն ու դժգոհութիւն, համախմբուել իշխանութեան շուրջ եւ միասնական ջանքերով յաղթահարել այս լրջագոյն մարտահրաւէրը:
Ս.Դ.Հ.Կ Կեդրոնական Վարչութիւն
Յունիս 8, 2020
