image
Հրատապ լուրեր:

ՀՅԴ Բիւրոն խստօրէն կը դատապարտէ Ատրպէյճանի եւ Թուրքիոյ ղեկավարներու յայտարարութիւնները եւ կը հրաւիրէ միջազգային հանրութեան ուշադրութիւնը

ՀՅԴ Բիւրոն խստօրէն կը դատապարտէ Ատրպէյճանի եւ Թուրքիոյ ղեկավարներու յայտարարութիւնները եւ կը հրաւիրէ միջազգային հանրութեան ուշադրութիւնը

2020 թուականի Դեկտեմբերի 10ին Բաքւում անցկացուած զինուորական շքերթի ժամանակ Թուրքիայի եւ Ադրբեջանի ղեկավարներն իրենց թոյլ են տուել ատելութեան խօսք պարունակող, հայապատկան տարածքներում հայ ժողովրդի ֆիզիքական գոյութեանը սպառնացող, Հայաստանի եւ Արցախի Հանրապետութիւնների տարածքային ամբողջականութիւնը կասկածի տակ դնող յայտարարութիւններ: Ադրբեջանի ղեկավարը չի խորշել հերթական անգամ Սիւնիքը, Գեղարքունիքն ու մայրաքաղաք Երեւանը համարել որպէս ադրբեջանապատկան տարածքներ: Աւելին, իր հերթին Թուրքիայի ղեկավարը, վկայակոչելով Էնվէր փաշային, ըստ էութեան հերթական անդամ իրեն դիտում է որպէս հայութեան մեծագոյն դահիճներից մէկի գործի շարունակող:

Բաքուի կենտրոնական հրապարակում արուած յայտարարութիւնների բնոյթը նաեւ վկայում է այն մասին, որ թուրք-ադրբեջանական տանդեմի (լծակից զոյգի-Խմբ.)` Արցախի նկատմամբ սանձազերծած ագրեսիան (յարձակումը-Խմբ.) եւ դրա արդիւնքում հայկական բնակավայրերի օկուպացիան (գրաւումը-Խմբ.) ոչ միայն չեն զսպել այդ երկրների ախորժակը, այլ նաեւ հայապատկան տարածքների նկատմամբ նոր յաւակնութիւնների են մղել:

Փաստօրէն, նախորդ դարասկզբին հայութեան նկատմամբ մարդկութեան պատմութեան խոշորագոյն ոճիրներից մէկն իրականացրած պետութիւնը նոյնիսկ այսօր էլ սպառնում է հայութեան ֆիզիքական գոյութեանն ու անկախ պետականութեանը, իսկ Հայաստանի հարաւի նկատմամբ յաւակնութիւններն օրըստօրէ դառնում են առաւել առարկայական: Ակնյայտ է նաեւ, որ Նոյեմբերի 9ի եռակողմ յայտարարութիւնից յետոյ Թուրքիան նոր թափով է շարունակում հարեւան բացառապէս բոլոր տարածաշրջանները եւ յատկապէս Հարաւային Կովկասն ապակայունացնելու իր գործելաոճը` բացէ ի բաց յայտարարելով Հայաստանի հարաւով Ադրբեջանին, ապա նաեւ Միջին Ասիայի թիւրքալեզու ժողովուրդներին միանալու իր վաղեմի նպատակի մասին:

Այս հաստատումներից հետեւում է, որ թուրք-ադրբեջանական տանդեմը մեր տարածաշրջանում անվտանգային համակարգի թիւ մէկ սպառնալիքն է, ինչը ակներեւ դրսեւորուեց վերջին պատերազմի ընթացքում ադրբեջանաթուրքական համատեղ ռազմարշաւով եւ Թուրքիայի կողմից ջիհադական վարձկաններին տարածաշրջան փոխադրելով:

Հաշուի առնելով տարածաշրջանում թուրքական ռազմաքաղաքական գործօնի շարունակաբար ակտիւացումը (աշխուժացումը-Խմբ.), ջիհադական ծայրայեղականների տեղակայման միջոցով Հարաւային Կովկասի առանձին հատուածների ժողովրդագրական եւ կրօնական նկարագրի փոփոխութեան փորձերը, որոնք յղի են տեւական ժամանակահատուածով տարածաշրջանում բացառել կայուն խաղաղութիւնը, ՀՅ Դաշնակցութեան Բիւրօն դիմում է միջազգային հանրութեանը, ԵԱՀԿ Մինսկի խմբի համանախագահ պետութիւններին եւ գործընկեր միջազգային կազմակերպութիւններին` ամենայն ուշադրութեամբ հետեւելու եւ կանխելու թուրքական ծաւալապաշտական քաղաքականութիւնը: Ցանկանում ենք յիշեալ զարգացումների վրայ հրաւիրել նաեւ ՌԴ ղեկավարութեան ուշադրութիւնը: Ռուսաստանի Դաշնութիւնն, իբրեւ 1994 թուականի Մայիսի 12ի զինադադարի համաձայնագիրը եւ 2020 թուականի Նոյեմբերի 9ի եռակողմ յայտարարութիւնը ստորագրող կողմ, առաւել ընդգրկուն պատասխանատեւութիւն է կրում տարածաշրջանային խաղաղութեան եւ կայունութեան համար:

Միաժամանակ յայտնում ենք, որ ՀՅ Դաշնակցութիւնը, անկախ ամօթալի պարտութեան պատճառ դարձած ՀՀ իշխանութեան հանդէպ դիրքորոշումից, իր համաշխարհային կառոյցով եւ Հայ Դատի միջազգային ցանցով, շարունակում է Հայաստանի արտաքին քաղաքական շահերի սպասարկման, մեր ժողովրդի անժամանցելի իրաւունքների պաշտպանութեան աշխատանքները`յաճախ դիմակայելով ադրբեջանական եւ թուրքական համատեղ լոբբիստական ցանցի մարտահրաւէրներին:

 

ՀՅԴ ԲԻՒՐՕ

2020թ. Դեկտեմբերի 11