Պաքուի բանտերուն մէջ գտնուող եւ անցեալ Նոյեմբերին գերեվարուած լիբանանահայ Վիգէն Իւլճէքճեան դատապարտուեցաւ 20 տարուան ազատազրկման:
Վիգէնի դէմ արձակուած վճիռը հաստատուեցաւ 14 Յունիսի առաւօտ:
Դատարանի վճիռին համաձայն՝ առաջին հինգ տարիները Իւլճէքեանը պիտի անցնէ բանտին մէջ, իսկ մնացած ժամկէտը պիտի կրէ խիստ ռեժիմի գաղութին մէջ։
Յիշեցնենք, որ անցնող շաբաթ՝ 8 Յունիսին մեկնարկած էր անոր դատավարութիւնը:
Ատրպէյճանի մէջ անոր մեղադրանք առաջադրուած է «վարձկանութիւն», «ահաբեկչութիւն», «Ատրպէյճանի պետական սահմանի ապօրինի հատում» յօդուածներով:
Իւլճէքեանի գործով մեղադրանքը կառուցուած է միայն ամբաստանեալի «խոստովանական» ցուցմունքներուն հիման վրայ։
Մինչդեռ յայտնի է, որ 2015-ին Իւլճէքեանը ստացած է Հայաստանի քաղաքացիութիւն, 2019-ին տեղափոխուած է սկիզբը Երեւան, այնուհետեւ` Շուշի։
Յիշեցնենք, որ Վիգէնը անցեալ 10 Նոյեմբերին գերեւարուած էր Բերձոր շրջանին մէջ, իր ընկերակից Մարալ Նաճարեանին հետ:
Աւելի ուշ Մարալը, շնորհիւ լիբանանեան ու ռուսական նախաձեռնութեան, ազատ արձակուած էր ու վերադարձած իր ծննդավայրը՝ Պէյրութ: