13.09c
Երեվան
երք, ապր 16
Սեպտեմբերի 12-ին, նախագահութեամբ Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսի, տեղի ունեցաւ Մայր Աթոռ Սուրբ Էջմիածնի Գեւորգեան հոգեւոր ճեմարանի 2017-2018 թթ. ուսումնական տարուայ բացումը:
Ցերեկոյթը սկսուեց միասնական Տէրունական աղօթքով, ապա կատարուեց ուսանողների օրհնութեան կարգ:
Հայաստանի Հանրապետութեան եւ ճեմարանի օրհներգերից յետոյ բացման խօսքով հանդէս եկաւ Գեւորգեան ճեմարանի տեսուչ Տ. Գարեգին վարդապետ Համբարձումեանը: Հոգեշնորհ Հայր Սուրբը, շնորհաւորելով նոր ուսումնական տարուայ մեկնարկի առիթով, տեղեկացրեց, որ այս տարուայ 48 դիմորդներից Գեւորգեան հոգեւոր ճեմարան է ընդունուել 18 սան, եւս 18-ը`Սեւանի Վազգէնեան հոգեւոր դպրանոց:
Անդրադառնալով ճեմարանի դերին ու առաքելութեանը`Հայր Սուրբը նշեց, որ այստեղ ձեւաւորւում է հայ ազգի հոգու ապագայ մշակը, որի համար մարդակերտման ու հոգեկերտման կարեւորագոյն որակ պիտի դառնայ մղումը` դարման լինելու բեկեալի սրտին, սփոփանք լինելու կարօտեալի վշտին, յարատեւ աղօթք ընծայելու տիեզերքի Արարչին, անտարբեր չլինելու կեանքում որեւէ երեւոյթի հանդէպ: «Ի չիք է ամէն գիտելիք եւ ուսում, եթէ այն միտուած չէ այլոց կեանքի մէջ բարերար ներդրում ունենալուն, եթէ այն ձեռք չի բերւում այն գիտակցումով, որ ամէն պարգեւ Տիրոջից է եւ Նրան պիտի դարձուի»,-ընդգծեց Հայր Գարեգինը:
Իր խօսքում Հայր Գարեգինը տեղեկացրեց արձակուրդային շրջանում քարոզչական, հովուական, կրթական եւ սոցիալական տարբեր ծրագրերում ճեմարանականների ունեցած ակտիւ մասնակցութեան մասին: ԳՀՃ տեսուչն անդրադարձաւ նաեւ առաջիկայ ուսումնական տարում իրականացուելիք մի շարք կրթայ-գիտական, հրատարակչական եւ մշակութային ծրագրերին: Ճեմարանի համար այս տարին նշանակալի է նաեւ նախորդ տարի հաստատուած ասպիրանտական կրթութեան մեկնարկով:
Հանդիսութեան ընթացքում կոմիտասեան երգերով հանդէս եկաւ Գեւորգեան հոգեւոր ճեմարանի երգչախումբը՝ ղեկավարութեամբ բարեշնորհ Արթուր սարկաւագ Վարդանեանի: Իսկ Արարատեան հայրապետական թեմի երիտասարդաց միութեան լարային քառեակի կատարմամբ հնչեց Ա. Վիւալդիի «Տարուայ եղանակներ»-ից «Ամառ»-ը:
Հանդիսութիւնն ամփոփուեց Նորին Սրբութիւն Գարեգին Բ Ամենայն Հայոց Կաթողիկոսի օրհնութեան խօսքով:
Վեհափառ Հայրապետն իր բարեմաղթանքն ու շնորհաւորանքները փոխանցեց նոր ուսումնական տարեմուտի առիթով` նշելով, որ այս իրադարձութիւնն ամէն անգամ նոր յոյսեր ու տեսլականներ է ձեւաւորում, որոնք աղօթքով ու գործով պիտի իրականութիւն դառնան եւ արդիւնքներ պարգեւեն մեր ազգին եւ Սուրբ Եկեղեցուն:
Անդրադառնալով հոգեւորականի կերպարին` Նորին Սրբութիւնն ընդգծեց, որ Հայոց Եկեղեցին մեծապէս կարեւորել է եւ ժողովուրդը մեծարել ազգային կեանքում հաւատքով զօրեղ, գիտելիքներով զինուած, սիրոյ ու անձնուիրումի ոգով գործող հոգեւորականի սպասաւորութիւնը: «Քրիստոսի հաւատարիմ սպասաւորը չի բնորոշւում սոսկ իր կրած սքեմով, այլ ինքն է արժեւորում իր կոչումն ու համազգեստը, արգասաւորում իր ստանձնած առաքելութիւնը, ի սէր Աստծոյ եւ ժողովրդի յաղթահարում փորձութիւններ, համբերութեամբ ու ըմբռնումով տանում նաեւ զրկանքներ եւ Տիրոջ սէրն ու խաղաղութիւնը սփռում իր հաւատաւոր հօտի, իր ժողովրդի կեանքում»,- ասաց Վեհափառ Հայրապետը` յաւելելով, որ այսպիսի ընկալումով դասախօսները տեսչութեան գլխաւորութեամբ պիտի իրականացնեն հոգեւորական կրթելու եւ դաստիարակելու առաքելութիւնը:
Հայոց Հովուապետը յորդորեց ճեմարանականներին նոյն այդ գիտակցութեամբ առաջնորդուել իրենց ուսումնառութեան մէջ` Սուրբ Եկեղեցու արժանաւոր մշակ դառնալու` օրինակ ունենալով հայոց լուսաւորիչներին, թարգմանիչ վարդապետներին, Նարեկացուն, Շնորհալուն, Կոմիտասին եւ բազում այլոց, որոնց փառքն ու գործը շողարձակել են հայոց պատմութեան դարաւոր ընթացքում:
Նորին Սրբութիւնն իր գնահատանքն ու օրհնութիւնը բերեց տեսչութեանը, դասախօսական կազմին եւ ուսանողներին` մաղթելով, որ Աստծոյ Աջը հովանի լինի ամէնքին եւ առաջնորդի ուսումնական կեանքի ճանապարհով՝ ապահովելով բարի արդիւնքներ:
Բացման հանդիսութիւնը փակուեց Ամենայն Հայոց Կաթողիկոսի «Պահպանիչ» աղօթքով եւ Հայրապետական մաղթերգով:
Հանդիսութեանը ներկայ էին Մայր Աթոռի միաբաններ, Մայր Աթոռի հոգեւոր-կրթական հաստատութիւնների տեսչական ու դասախօսական անձնակազմերը, Գեւորգեան հոգեւոր ճեմարանի սաները եւ այլ հրաւիրեալներ:
