image
Հրատապ լուրեր:

Ամենայն Հայոց Կաթողիկոսն ընդունած է Արմաւիրի թեմի քահանաները

Ամենայն Հայոց Կաթողիկոսն ընդունած է Արմաւիրի թեմի քահանաները

Օգոստոսի 12-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնի «Վաչէ եւ Թամար Մանուկեան» Մատենադարանում ընդունեց Արմաւիրի թեմում սպասաւորող քահանաներին` գլխաւորութեամբ Արմաւիրի թեմի առաջնորդ Գերաշնորհ Տ. Սիոն արքեպիսկոպոս Ադամեանի:

Հանդիպումը սկսուեց Տէրունական աղօթքով, որից յետոյ Սրբազան Հայրը, հայցելով Նորին Սրբութեան օրհնութիւնը, իր ուրախութիւնը յայտնեց Մայր Աթոռ կատարած այցի առիթով։ Սիոն Սրբազանն իր խօսքում հաստատեց, որ թեմի հոգեւորականաց դասը համաւարակի դժուարին պայմաններում շարունակում է իրականացնել իր հոգեխնամ առաքելութիւնը։ Սրբազանը նաեւ իր խորին երախտագիտութիւնն արտայայտեց Հայոց Հովուապետին համաւարակի պայմաններում թեմի սոցիալապէս անապահով ընտանիքներին ցուցաբերած նիւթական աջակցութեան համար։

Հանդիպմանը Հանրակրթութեան պետական չափորոշչի եւ առարկայական չափորոշիչների, դրանցում առկայ խնդիրների, մարտահրաւէրների եւ արտայայտուած մտահոգութիւնների մասին զեկոյց ներկայացրեց Մայր Աթոռ Սուրբ Էջմիածնի Քրիստոնէական դաստիարակութեան կենտրոնի տնօրէն Հոգեշնորհ Տ. Զաքարիա ծայրագոյն վարդապետ Բաղումեանը՝ մէկ անգամ եւս հաստատելով Մայր Աթոռի դիրքորոշումներն այս հարցերի վերաբերեալ: Հայր Սուրբը շեշտեց, որ կրթական բարեփոխումները պէտք է միտուած լինեն ազգային ինքնութեամբ, հոգեւոր-ազգային արժեհամակարգով, բարոյական նկարագրով եւ ժամանակակից մարտահրաւէրներին համահունչ քաղաքացու կերտմանը՝ ի շահ հայոց պետութեան զօրացման եւ շարունակականութեան։ Հայր Զաքարիան մասնաւոր անդրադարձ կատարեց նաեւ «Հայոց Եկեղեցու պատմութիւն» առարկային՝ նշելով, որ անընդունելի է առարկայի՝ որպէս առանձին բաղադրիչի դուրս բերումը հանրակրթական դպրոցից։

Զեկոյցի վերաբերեալ տեղի ունեցան քննարկումներ, որի ընթացքում Ամենայն Հայոց Կաթողիկոսը նոյնպէս պատասխանեց քահանայ հայրերի հարցերին`  յոյժ կարեւոր նկատելով հոգեւորականութեան դերակատարութիւնը քրիստոնէական եւ ազգային արժեհամակարգի կերտման ու պահպանման գործում։

Այնուհետեւ «Եկեղեցու սոցիալական ծառայութեան դերը հովուական առաքելութեան մէջ» թեմայով բանախօսեց Մայր Աթոռի Սոցիալական ծառայութեան կենտրոնի տնօրէն Արժանապատիւ Տ․ Մարկոս քահանայ Մանգասարեանը՝ ներկայացնելով նաեւ համաւարակի պայմաններում Մայր Աթոռի կողմից իրականացուած սոցիալական միջոցառումները։

Բանախօսութեանը յաջորդած քննարկումների ընթացքում կարեւորուեց հոգեւորականների կողմից սոցիալական ծառայութեան իրականացումը հասարակական կեանքի տարբեր ոլորտներում։

Վերջում Գարեգին Երկրորդ Ամենայն Հայոց Հայրապետն իր գնահատանքն ու հայրական օրհնութիւնը բերեց Արմաւիրի թեմի քահանայից դասին՝ իրենց նուիրեալ ծառայութիւնը յանձնառութեամբ եւ պատասխանատուութեամբ իրականացնելու համար։ Նորին Սրբութիւնն ընդգծեց, որ իւրաքանչիւր հոգեւորական պատասխանատուութիւն է կրում երկրի անվտանգութեան, ժողովրդի կրթութեան, բարօրութեան, առաջընթացի եւ պետութեան զօրացման գործում։ Հայոց Հովուապետը յորդորեց եկեղեցականներին իրենց առաքելութեան մէջ լինել քաջ, համարձակ, համբերատար եւ նախանձախնդրութեամբ պաշտպանել հոգեւոր ու ազգային արժէքները։

Հանդիպումը եզրափակուեց «Պահպանիչ» աղօթքով։

Առաջիկայում եւս Մայր Աթոռ Սուրբ Էջմիածնում նախատեսւում են նմանօրինակ հանդիպումներ հայաստանեան թեմերի հոգեւորականաց դասի հետ: