Յայտնի դարձած են միջուկային գիտնական, Իրանի միջուկային ծրագրի գլխաւոր մասնագէտ Մուհսէն Ֆախրիզատէի սպանութեան մանրակրկիտ գործողութեան մանրամասները: Իրանի ղեկավարութիւնը կը պնդէ, որ սպանութեան ետին կանգնած է Իսրայէլը: Այս մասին գրած է Daily Mail պարբերականը` յղում տալով իրանցի լրագրող Մուհամատ Ահուազէի տուեալներուն: Վերջինս կը վստահեցնէ, որ այդ տուեալները ստացած է իսլամական հանրապետութեան իշխանութիւններէն:
Ֆախրիզատէն, որուն կ'անուանեն Իրանի միջուկային ռումբի ծրագրի «հայր», գնդակահարուած է ուրբաթ օր՝ 27 նոյեմբերին: Գործողութեան վերջին փուլին ներգրաւուած եղած է 12 գործակալ, որոնց Ահուազէն կ'անուանէ «բարձր որակաւորում ունեցող մարդասպաններ»: Զինեալները, որոնց շարքերուն մէջ 2 դիպուկահար կար, կը կազմէին 62 հոգինոց դաւադիր խումբի մէկ մասը: Իրանցի լրագրողը նշած է, որ մնացած 50 հոգին պատասխանատու էին սարքերու ապահովման համար:
Ֆախրիզատէի մեքենային վրայ յարձակումը տեղի ունեցած է Թեհրանէն 80 քմ հիւսիս-արեւելք գտնուող Ապսարտ քաղաքի մօտակայքը: Յարձակումը ծրագրուած եղած է օղակաձեւ ճանապարհի մօտակայքը՝ քաղաք տանող խիտ անտառածածկ փողիցի ներքեւի հատուածին մէջ:
«Հաշուեյարդար խումբը» երկար ժամանակ ուսումնասիրած էր միջուկայինի գիտնականի աշխատանքային ժամերը, անոր շարժման ուղիները եւ գիտցած էր, որ ան ուրբաթ օրը կը պատրաստուի Թեհրանէն Ապսարտ երթալ: Մօտ 10 000 բնակչութիւն ունեցող քաղաքին մէջ շատ հարուստ թեհրանցիներ երկրորդ տուն ձեռք բերած են, եւ 59-ամեայ Ֆախրիզատէն (այլ աղբիւրներու համաձայն, ան 62 տարեկան էր), այնտեղ առանձնատուն ունէր:
Դարանակալման վայրին մէջ անոր կը սպասէր Hyundai Santa Fe մեքենան՝ 4 ուղեւորով, 4 շարժակաւոր հեծելանիւով եւ երկու դիպուկահարով՝ ականապատուած Nissan փիքափի հետ միասին: Ուղեկցորդներով եկող Ֆախրիզատէի մեքենայի ժամանումէն կէս ժամ առաջ`(գիտնականին կ'ուղեկցէր ընդամէնը 3 փամփուշտազերծ մեքենայ) տարածքին մէջ ելեկտրականութիւնն անջատուած է: Ֆախրիզատէի մեքենան շարասիւնի կեդրոնն էր: Երբ անոր ուղեկցող երրորդ մեքենան անցած է «հաշուեյարդար խուբիի» կողմէ կանխորոշուած կէտը, ճանապարհին կանգնած Nissan-ը պայթած է:
Երկրորդ մեքենան, որուն մէջ կը գտնուէր Ֆախրիզատէն, այնուհետեւ գնդակահարուած է 12 յատուկ գործակալի, այդ շարքին՝ երկու դիպուկահարի կողմէ: Կատաղի փոխհրաձգութիւն սկսած է գիտնականի թիկնապահներու ու յարձակողներու միջեւ:
«Մարդասպաններու խումբի հրամանատարը Ֆախրիզատէին դուրս հանած է իր մեքենայէն, գնդակահարած է եւ համոզուած, որ ան սպանուած է»,-կը պնդէ Ահուազէն՝ աւելցնելով, որ յանցագործները անհետացած են դէպքի վայրէն՝ առանց կորուստներ ունենալու:
Մուհսէն Ֆախրիզատէն ոստիկանական ուղղաթիռի միջոցով տեղափոխուած է մօտակայ հիւանդանոց: Ըստ պաշտօնական վարկածի՝ ան ստացած վիրաւորումներէն մահացած է ոչ թէ յարձակման վայրին մէջ, այլ բժշկական հաստատութեան մէջ:
Յիշեցնենք, որ 27 նոյեմբերին Իրանի մէջ սպանուած է երկրի պաշտպանութեան նախարարութեան առընթեր հետազօտութիւններու եւ նորարարութիւններու կազմակերպութեան ղեկավար, միջուկային ֆիզիկոս Մուհսէն Ֆախրիզատէն։