Օրեր առաջ կեանքէն հեռացած լիբանանահայ նշանաւոր երգիչ Ատիս Հարմանտեանի հարազատները առաջարկած են երգիչի մահուան կապակցութեամբ ծաղկեպսակի փոխարէն նուիրատւութիւն կատարել Լիբանանի «Թռչնոց բոյն» հաստատութեան:
«Թռչնոց բոյնը» 1922 թուականին Լիբանանի Ժըպայլ (Պիպլոս) քաղաքի դանիացի միսիոներուհի Մարիա Ճաքոփսընի կողմէ հիմնուած որբանոց-վարժարան է, ուր ցեղասպանութենէն ետք հանգրուանած են Հայոց ցեղասպանութենէն մազապուրծ հայ որբերը. հաստատութիւնը այսօր ալ կը ծառայէ կարիքաւոր երեխաներու խնամքին ու կրթութեան:
Մեծի Տանն Կիլիկիոյ կաթողիկոսութեան հովանաւորութեան տակ գտնուող «Թռչնոց բոյն» որբանոցի ամենահին շէնքերէն մէկուն մէջ 2015 թուականի 18 յուլիսին, Հայոց ցեղասպանութեան 100-րդ տարելիցի միջոցառումներու շրջանակէն ներս, բացուած է Հայոց ցեղասպանութեան որբերու թանգարանը, որ նոյնպէս կը կրէ «Թռչնոց բոյն» անուանումը։ Թանգարանի երեք բաժիններուն մէջ ներկայացուած են Հայոց ցեղասպանութեան, որբերու կեանքին եւ հայ ժողովուրդի վերածնունդին վերաբերող նկարներ, տեղեկութիւններ եւ իրեր: