Հակառակ 2018ին ապահովուած դատական նպաստաւոր որոշումին՝ Պոլսոյ հայկական «Սանասարեան տան» («Սանասարեան խան») սեփականութեան իրաւունքը հայութեան վերդարձնելու գծով, 2019ին Թուրքիոյ վճռաբեկ դատարանը որոշած էր շէնքը «նուիրել» Թուրքիոյ Հիմնադրամներու գլխաւոր վարչութեան: Կը գրէ «Էրմենիհապեր»ը:
Ըստ վերջերս թրքական մամուլին մէջ շրջանառուող լուրերուն՝ հայկական պատմական այդ կառոյցը շուտով պիտի շահագործուի իբրեւ 5 աստղանի պանդոկ: Կը նշուի, որ շէնքին վերականգնման համար յայտարարուած մրցոյթը շահած կազմակերպութիւնը շէնքը 35 տարիով օգտագործելու իրաւունք ստացած է։
Այս հարցին անդրադառնալով, Թուրքիոյ քրտամէտ Ժողովուրդներու ժողովրդավարական կուսակցութեան հայ պատգամաւոր Կարօ Փայլան խորհրդարանին միջոցաւ հարցումներ յղեց Թուրքիոյ մշակոյթի եւ զբօսաշրջութեան նախարար Մեհմետ Նուրի Էրսոյին, յստակացումներ պահանջելով։
Փայլան նշեց, որ «Սանասարեան տուն»ը վարձակալութեան յանձնելը կը վիրաւորէ հանրային խիղճը եւ կ՛անտեսէ դատական գործընթացները:
Ստորեւ՝ Փայլանի հարցումները.
Յիշեցնենք, որ «Սանասարեան տուն»ը կառուցուած է 1881ին, կարինցի հայ վաճառական եւ բարերար Մկրտիչ Սանսարեանի կողմէ, նպատակ ունենալով Կարին գտնուող նոյնանուն դպրոցին համար եկամուտ ապահովել: Շէնքին կառավարման իրաւունքը յանձնուած է «Սանասարեան» հիմնարկին, իսկ հիմնարկին ղեկավարութիւնը՝ Պոլսոյ Հայոց պատրիարքին: Անգարա շէնքը բռնագրաւեց 1930ականներու երկրորդ կիսուն եւ սկսաւ զայն օգտագործել իբրեւ ոստիկանութեան շէնք, իսկ այնուհետեւ հոն հաստատուեցաւ տնտեսական դատարանը: