«Էրմէնիհապէր» կայքէն կը կարդանք, որ Թուրքիոյ «Գորշ գայլեր» կազմակերպութեան քաղաքական թեւը հանդիսացող «Ազգայնական շարժում» կուսակցութեան գլխաւոր քարտուղար՝ Իսմէթ Պիւյուքաթամանը անդրադարձած է Կ.Պոլսոյ Յունաց Տիեզերական պատրիարք՝ Բարթողոմէոս Առաջինի՝ Սուրբ Սոֆիա տաճարը մզկիթի վերածելու վերաբերեալ քննադատութիւններուն։
Նշուած է, որ նախօրէին, ուղղափառ տիեզերական առաջնորդը նշած էր, որ Սուրբ Սոֆիա տաճարը պէտք է շարունակէ պահպանել թանգարանի կարգավիճակը։
Պիւյուքաթամանը Twitter-ին վրայ գրած է․
«Քանի որ (պատրիարքը) չէ կրցած ըսել, որ Սուրբ Սոֆիան եկեղեցիի վերածուի. ըսած է, Այա Սոֆիան 900 տարի ծառայած է քրիստոնեաներուն եւ 500 տարի ալ իսլամներուն, ուստի, պէտք է պահպանէ թանգարանի կարգավիճակը։ Բարթողոմէոսը բացի պարզ թուաբանական սխալէն, նաեւ տրամաբանական մեծ սխալ ըրած է»։
Ազգայնական գործիչը պնդած է, որ Սուրբ Սոֆիա տաճարը Պոլսոյ գրաւումէն յետոյ թրքացած է եւ Պոլսոյ թուրք-իսլամական կարեւոր կառոյցներէն կը համարուի։
Ան, այնուհետեւ, անդրադառնալով տաճարը մզկիթի վերածելու պարագային, աշխարհի միլիոնաւոր քրիստոնեաներու մօտ հակաիսլամական տրամադրութիւններ առաջանալու մասին պատրիարքի դիտարկումին, վիրաւորած է քրիստոնեաներու կրօնական արժէքները։
Պիւյուքաթամանը պնդած է, որ պատրիարքը իր տողատակային յայտարարություններով «չափը անցած է»։
Ան կոչ ուղղած է պատրիարքին, որ «իր մտահոգութիւնները յայտնէ աշխարհի, մասնաւորապէս Յունաստանի մէջ իսլամական կառոյցներու շուրջ, որոնք կ'ոչնչանան»։