Ընթացիք Ռամատան ամսուն արաբական տարբեր հեռուստակայաններէ սփռուող սուրիական ֆիլմաշարերը այս տարի եւս կը թափանցեն Սուրիոյ պատերազմական իրավիճակը, որոնցմէ գլխաւորը «Խառնաշփոթ» (Ֆաուտա) կոչուած ֆիլմաշարն է:
Շարք մը արաբական հեռուստակայաններու ցուցադրած «Խառնաշփոթ»ը, ըստ շատերու, ամենաշատ դիտումներու արժանացածն է այս տարուան ռամատանեան ֆիլմաշարերուն մէջ:
«Խառնաշփոթ»ը գրողներ Հասան Սամի Եուսէֆի եւ Նաճիպ Նսայրի համատեղ ուժերով ծնունդ առած է, որ ըստ հեռուստադիտողներէն շատերու, ֆիլմաշարի յաջողութեան գրաւականն է:
Ֆիլմաշարը կը պատկերէ Սուրիոյ պատերազմական իրավիճակը, խմբակային տեղահանութիւններու տեսարանները, ինչպէս նաեւ պատերազմի հետեւանքով առաջ եկած դատական համակարգի փտածութիւնը, մաֆիաները, իրավիճակը շահագործողները, որոնք երկիրը մատնած են խառնաշփոթի: