image

Տեղի ունեցաւ Գեւորգեան հոգեւոր ճեմարանի 2017-2018 ուսումնական տարուայ փակումը

Տեղի ունեցաւ Գեւորգեան հոգեւոր ճեմարանի 2017-2018 ուսումնական տարուայ փակումը

Յուլիսի 3-ին, նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի, Մայր Աթոռ Սուրբ Էջմիածնում տեղի ունեցաւ Գեւորգեան հոգեւոր ճեմարանի` 2017-2018 ուսումնական տարուայ փակման հանդիսութիւնը:

Միջոցառումը բացուեց միասնական Տէրունական աղօթքով, որից յետոյ հնչեցին ՀՀ եւ Գեւորգեան հոգեւոր ճեմարանի օրհներգերը:

Այնուհետեւ խօսք ասաց Գեւորգեան հոգեւոր ճեմարանի տեսուչ Հոգեշնորհ Տ. Գարեգին վարդապետ Համբարձումեանը:

«Իւրաքանչիւր տարի ճեմարանական կեանքի վրայ դաջւում է որպէս անմոռաց յիշատակ ուսումնական բուռն գործընթացի, աղօթական հոգենորոգ ապրումների ու պարզ ընտանեկան` քրիստոնեայ համայնքին յատուկ անցուդարձի: 

Հոգեւոր կրթութեան առանցքում ընկած է զոհողութեան ոգին, որը թրծուելով վեցամեայ բովում, վերածւում է ծառայելու պատրաստակամութեան: Ընդ որում ճեմարանի կրթութիւնը յաջողուած պիտի համարուի, եթէ այստեղ աւարտող ցանկացած սան գիտակցի, թէ դեռեւս մի ողջ օւկեան գիտութեան եւ իմաստութեան մնացել է աննուաճ իր կեանքում: Այսուհանդերձ, իր տարիների ուսումը բարերար հարթակ պիտի ստեղծի ու անյագուրդ ցանկութիւն իր մնացեալ ծառայական կեանքը դարձնելու ոչ այլ բան, քան Աստծոյ միջոցով աշխարհը բացայայտելու ճամփորդութիւն` չմոռանալով ի հարկէ Սուրբ Նազիազանցի հայրապետի խօսքերը. «Յիշիր Աստծուն աւելի յաճախ, քան դու շնչում ես»», - ասաց տեսուչ Հայր Սուրբը:

Գարեգին վարդապետը տեղեկացրեց անցնող ուսումնական տարում արձանագրուած յաջողութիւնների մասին: Տեղեկացուեց, որ ընթացիկ ուսումնական գործընթացները համեմուեցին մշակութային միջոցառումների մասնակցութեամբ, միջհամալսարանական գիտական ու սպորտային ծրագրերով: Տեղի ունեցաւ Ս. Յովհան Օձնեցի կաթողիկոսի գահակալման 1300-ամեակին նուիրուած գիտաժողով, Մաղաքիայ արք. Օրմանեանի մահուան 100-ամեայ տարելիցին նուիրուած նիստ: Ուսումնական տարուայ ընթացքում դասախօսելու համար ճեմարան հրաւիրուեցին հեղինակաւոր դասախօսներ Ռուսաստանից, ԱՄՆ-ից, Ֆրանսիայից, Իսրայէլից եւ այլն: Գիտելիքները ծառայութեան մէջ կիրառելու նպատակով ճեմարանականներից շատերն այցելել են մանկատներ, ծերանոցներ, հիւանդանոցներ ու բարեսիրական այլ կառոյցներ, նաեւ Երեւանի եւ Էջմիածնի տարածաշրջանի երիտասարդական որոշ հաստատութիւններ: 

Տեսուչը յայտնեց, որ Վեհափառ Հայրապետի օրհնութեամբ այս տարի եւս ճեմարանի սաները մէկամսեայ ամառային ծառայութեան կը մեկնեն Հայաստանի, ինչպէս նաեւ Ռուսաստանի, Եւրոպայի եւ ԱՄՆ-ի թեմեր` հմտանալու թեմական, հովուական ծառայութեան մէջ: Տեղեկացուեց նաեւ, որ վերջերս տեղի ունեցան Գեւորգեան հոգեւոր ճեմարանի ասպիրանտուրայի առաջին դիմորդների ընդունելութեան քննութիւնները, ինչի արդիւնքում առաջիկայ ուսումնական տարում ճեմարանը կը գործի ամբողջական եռաստիճան կրթութեան ձեւաչափով: 

            Հայր Սուրբն իր երախտագիտութիւնը յայտնեց դասախօսներին եւ տեսչական կազմին` նուիրումի եւ շահեկան համագործակցութեան, վերատեսուչ Սրբազանին` օժանդակութեան եւ օգտակար խորհուրդների համար: 

Անդրադառնալով Ճեմարանի ու առհասարակ հոգեւորականների կրթութեան հանդէպ Նորին Սրբութեան ուշադրութեանը, որպէս ապացոյց հայրական սիրոյ, այս առաքելութեան հանդէպ մեծ հաւատքի ու տեսիլքի` Հայր Գարեգինը Վեհափառ Հայրապետին ճեմարանի տեսչութեան, դասախօսական եւ ուսանողական կազմերի անունից փոխանցեց ներկաների սէրն ու որդիական խոնարհումը: 

Այնուհետեւ երաժշտական կատարումներով հանդէս եկաւ Գեւորգեան հոգեւոր ճեմարանի երգչախումբը` ղեկավարութեամբ Արտաշէս Բաբուրեանի: Ուսանողութեան անունից խօսք ասաց աւարտական 6-րդ լսարանի սան Բարեշնորհ Դաւիթ սարկաւագ Սահակեանը, իսկ Նարեկ Գասպարեանը (2-րդ լսարան) ասմունքեց Հ. Թումանեանի «Հայրենիքիս հետ» բանաստեղծութիւնը: Քահանայից պատրաստութեան շրջանաւարտ լսարանի սաների անունից իր շնորհակալական խօսքն ուղղեց ներկաներին Միքայէլ դպիր Փարսադանեանը:

Ճեմարանի ուսումնական տարուայ փակման առիթով ներկաներին ողջունեց նաեւ Մայր Աթոռի հոգեւոր-կրթական բարձրագոյն հաստատութիւնների վերատեսուչ Գերաշնորհ Տ. Գեւորգ եպիսկոպոս Սարոյեանը: Սրբազան Հայրը, անդրադառնալով օրուայ խորհրդին, ի մասնաւորի նշեց. «Յիրաւի սպասուած է այսօրը թէ՛ սանի եւ թէ՛ մանկավարժի համար: Սակայն այդ սպասումը ճեմարանցու հոգեբանութեան մէջ այնքան չի առնչւում արձակուրդի կամ հանգստի գաղափարի հետ, որքան, որ կապւում է գիտութեան յաջորդ աստիճանը յաղթահարելու առաջադրանքի հետ: Այդ գիտակցութեան լոյսի ներքոյ պէտք է դիտել ուսումնական տարուայ փակման հանդիսաւոր արարողութիւնը, որն իր բնոյթով յատուկ է միայն ճեմարանական միջավայրին, ըստ էութեան տօնական: Գիտութեան աստիճանի յաղթահարումն այլ խօսքով՝ ճեմարանական միջավայրում տօնական նշանակութիւն ունի: Ահաւասիկ այսօր մենք տօնում ենք այդ իրադարձութիւնը: Աշխարհիկ հաստատութիւնները չունեն այս աւանդոյթը»:

Հանդիսութեան ընթացքում կատարուեց նաեւ նուիրաբաշխութիւն: Ամենայն Հայոց Կաթողիկոսի ձեռամբ ուսման մէջ բարձր առաջադիմութեան եւ կարգապահութեան համար պարգեւների արժանացան տարբեր լսարանների ուսանողներ:

Վերջում Գեւորգեան հոգեւոր ճե­մա­րանի սաներին, դասախօսներին եւ ներկայ եկեղեցականներին իր պատգամն ուղղեց Նորին Սրբութիւն Գարեգին Բ Ամենայն Հայոց Կաթողիկոսը:

«Մեր Սուրբ Եկեղեցու կեանքում մեծ դերակատարութիւն եւ առաքելութիւն է վերապահուած Գեւորգեան հոգեւոր ճեմարանին` կրթելու, դաստիարակելու եւ «քաջ հովիւներ» հասցնելու Հայ Եկեղեցու համար, ովքեր Տիրոջով զօրացած եւ մեր լուսամիտ հայրերի հաւատքով գօտեպնդուած` պիտի շարունակեն Աւետարանի լոյսը ջամբել մեր «փոքր ածուին»` տէրունապատուէր սիրով, հաւատքով ու յոյսով առաջնորդելով դէպի փրկութիւն: Ճեմարանը մեր Եկեղեցու զարկերակն է, ներկայի եւ ապագայի առհաւատչեան, որի զօրացումն անխտիր ամէնքիս սրբազան պարտականութիւնն է: Հետեւաբար, առաւել գուրգուրանքով պիտի մօտենանք հոգեւոր կրթութեան եւ գիտութեան այս լուսաւոր կաճառին` մեր արդիւնաւոր նպաստը բերելով ճեմարանի զարգացմանը եւ գործունէութեան արդիւնաւորմանը:

Այսօրուայ մեր կեանքի պայմաններում, զանազան ներքին ու արտաքին մարտահրաւէրներին դէմ յանդիման, մեր Սուրբ Եկեղեցին եւ ժողովուրդը կարիքն ունեն բարձր պատրաստուածութիւն եւ մեծագոյն նուիրում ունեցող եկեղեցականների, ովքեր իրենց հոգեւոր ներուժով, իրենց հաւատքի եւ կեանքի օրինակով պիտի շարունակեն առաջնորդել եւ հովուել մեր ժողովրդին: Ժամանակի բոլոր մարտահրաւէրներին եւ խնդիրներին մեր պատասխանը պէտք է լինի նաեւ ազգի ու Եկեղեցու պայծառութեան ու վերելքի մեծ տեսլական ունեցող հոգեւորականների նոր սերնդի պատրաստութիւնը: Մեր Սուրբ Եկեղեցու, ազգի ու հայրենիքի պայծառութեան տեսիլքն է, որ պիտի առաջնորդի մեզ Քրիստոսապատուէր առաքելութեան ճանապարհին: Որպէս Ամենայն Հայոց Կաթողիկոս` ուրախութեամբ եւ հպարտութեամբ ենք արձանագրում, որ մեր եկեղեցականաց շարքերում բազում են այդպիսիք, ովքեր անտրտունջ, նախանձախնդիր ոգով եւ անսակարկ նուիրուածութեամբ իրենց ծառայութիւնն են բերում մեր ժողովրդին` չծնկելով դժուարութիւնների առաջ, արձանագրելով նորանոր յաջողութիւններ իրենց ծառայութեան մէջ», - ասաց Վեհափառ Հայրապետը:

Նորին Սրբութիւնը ճեմարանականներին պատգամեց ամենայն նախանձախնդրութեամբ շարունակել տէրունաւանդ սպասաւորութիւնը մեր ժողովրդի կեանքում` ամուր պահելով ծառայանուիրումի կամքը, անսասան՝ հաւատքը եւ անմնացորդ՝ սէրը Սուրբ Եկեղեցու հանդէպ: «Թէեւ մեր ժամանակացոյցի ծանրաբեռնուածութեան պատճառով հնարաւոր չի լինում առաւել յաճախ հանդիպել ձեզ հետ, սակայն դուք միշտ մեր աղօթքներում էք, մեր ուշադրութեան կենտրոնում: Ուսման մէջ արձանագրած ձեր յաջողութիւնները ուրախացնում են Հայրապետիս, թերացումները՝ մտահոգութիւն պատճառում եւ բերում անհրաժեշտութիւնը՝ դասախօսական կազմի հետ միասին ամէն ջանք գործադրելու մշտապէս ձեր ուսման արգասաւորման համար: Սիրելի սաներ, տեսնում էք, որ մեր Սուրբ Եկեղեցու դէմ ծառացած են արդի աշխարհի մարտահրաւէրները, աշխարհիկացման ընթացքները, նոր ժամանակներում հոգեւորի անտեսման միտումները, աղանդների ներթափանցումն ու աղանդաւորականների քայքայիչ գործելակերպը: Այս ամէնի առջեւ պիտի նախանձախնդիր լինէք՝ հաւատքով, գիտելեաց պաշարով զօրանալու, որպէսզի Քրիստոսի առաքեալների պէս շարունակէք Կենաց Խօսքը քարոզել եւ Աւետարանի լոյսը սփռել մեր ժողովրդի կեանքում», - յաւելեց Հայոց Հովուապետը` մաղթելով, որ ուշիմ եւ օրինակելի վարքով, գովելի նուիրումով արդիւնաւորեն իրենց ուսումը հոգեւոր կաճառում, որպէսզի կարողանան նորանոր յաղթանակներով հիւսել հայ ժողովրդի եւ Հայոց Եկեղեցու նորօրեայ փառքը:

Ամենայն Հայոց Կաթողիկոսը նաեւ հայրապետական իր օրհնութիւնն ու գնահատանքը յայտնեց Մայր Աթոռի հոգեւոր-կրթական հաստատութիւնների վերատեսուչ Գերաշնորհ. Տ. Գեւորգ եպիսկոպոս Սարոյեանին, Գեւորգեան հոգեւոր ճեմարանի տեսուչ Հոգեշնորհ Տ. Գարեգին վարդապետ Համբարձումեանին, տեսչական կազմին եւ բարեջան դասախօսներին իրենց նուիրեալ գործունէութեան համար:

Նորին Սրբութիւնն իր գնահատանքը յայտնեց նաեւ այն հոգեւորականներին, ովքեր իրենց ծառայութեան հետ մէկտեղ ազնիւ նպաստ են բերում ճեմարանականների կրութեանն ու ճեմարանի գործունէութեան արգասաւորմանը` պատգամելով մեծ ուշադրութեամբ, յոյժ կարեւորումով շարունակել դասախօսական իրենց ծառայութեամբ կրթել ու դաստիարակել իրապէս նուիրեալ եւ լուսամիտ եկեղեցականներ, Տիրոջ հնձի համար պատրաստել Սահակ-մեսրոպեան ոգով նոր մշակներ:

Նորին Վեհափառութիւնն աղօթեց, որ Բարձրեալն Աստուած անսասան պահի ու պահպանի մեր հայրենիքը եւ Առաքելական Սուրբ Եկեղեցին, զօրաւոր պահի եղբայրսիրութեան եւ նուիրումի ոգին Գեւորգեան հոգեւոր ճեմարանում, որպէսզի Հայ Եկեղեցու կրթական դարբնոցից դուրս եկած շրջանաւարտները ժրաջան ծառայութեամբ հոգեւոր նոր շունչ հաղորդեն մեր ժողովրդի կեանքին:

Հանդիսութիւնն եզրափակուեց հայրապետական «Պահպանիչ» աղօթքով:

Անցնող տարում ճեմարանն ունեցել է 106 ուսանող, հաստատութիւնում դասաւանդել է 25 հոգեւորական եւ 41 աշխարհական դասախօս: Այս տարի ճեմարանն աւարտեց 27 սարկաւագ: