Օգոստոսի 15-ին Հայ Ավետարանչական ընկերակցության հովանու ներքո գործող Հանքավանի Շիին – Շողիկ ճամբարում կայացավ օգոստոսի 2-ից սկսված ՀՀԵՀ փակման հանդիսավոր արարողությունը, որին մասնակցեց Սփյուռքի նախարար Մխիթար Հայրապետյանը:
Բացման խոսքով հանդես եկավ ՀՀԵՀ աշխատանքները համակարգող վերապատվելի Նշան Պագալյանը: Նա ներկայացրեց անցած օրերի կատարած աշխատանքները, նշեց երիտասարդների՝ հայրենիքի հետ կապի ամրապնդման, հայկական մշակույթի ծանոթացման, միջանձնային նոր հարաբերությունների կարևորությունը և նախանշեց հետագա անելիքները:
ԱՀԱԸ Հայաստանի ներկայացուցիչ Հարութ Ներսեսսյանը ողջունեց Սփյուռքի նախարար Մ. Հայրապետյանին, նշեց Սփյուռքի նախարարության և Ընկերակցության միջև համագործակցության զարգացման հեռանկարները և խոսքը փոխանցեց Մ. Հայրապետյանին:
Նախարարը շնորհավորական ուղերձում դիմելով Հ. Ներսեսսյանին, Հայաստանյայց Ավետարանական եկեղեցու ավագ հոգևոր հովիվ վեր. Մկրտիչ Մելքոնյանին, վեր. Ն. Պագալյանին, և երիտասարդներին ի սրտե շնորհավորեց և ողջույնի ջերմ խոսքեր հղեց ԱՀԱԸ-ի մեկդարյա հոբելյանի առթիվ Հայրենիքում կազմակերպված ՀՀԵՀ-ի բոլոր կազմակերպիչներին և մասնակիցներին:
Նա մասնավորապես ասաց. §Ուրախ եմ, որ այստեղ են գտնվում այն լավագույն երիտասարդ գործիչները, ովքեր իրենց եկեղեցիների երիտասարդական ծառայություններում ակտիվորեն ընդգրկված և աչքի ընկած անձինք են:
Վստահ եմ, որ ԱՀԱԸ այս երկշաբաթյա նախաձեռնության շնորհիվ Հայրենիքում և արտերկրում բնակվող սփյուռքահայ երիտասարդները, փոխադարձ ծանոթությունից բացի, կհաստատեն նոր կապեր, կփոխանակեն իրենց փորձն ու գիտելիքները, կնախանշեն ապագայի անելիքները¦:
Նախարար Մ. Հայրապետյանը համագումարի մասնակիցներին ներկայացնելով Սփյուռքի նախարարության «ՆերՈւժ» սթարթափերի ծրագիրն ասաց.
«Երիտասարդական այս հանդիպումը նոր կամուրջներ ստեղծելու և ամրապնդելու կարևոր հավաք է, որի գործարար ծրագրեր ունեցող յուրաքանչյուր մասնակցի այսօր մեր պետությունը հնարավորություն է տալիս Հայրենիքում ներգրավվելու «ՆերՈւժ» սփյուռքի երիտասարդական սթարթափերի ծրագրում, որը միտված է Հայրենիքի զարգացմանն ու հայրենադարձությանը։
Հայազգի երիտասարդ ձեռներեցների համար նախատեսված ինտերակտիվ այս ծրագիրն ուղղված է հենց ձեր նախաձեռնությունների առաջխաղացմանը, գիտելիքային բազայի հարստացմանը, կապերի ընդլայնմանն ու ամրապնդմանը։
Գնահատելի է, որ այս օրերին, ի թիվս այլ հանդիպումների և էքսկուրսիաների, Ձեր կատարած կամավոր աշխատանքներով աջակցել եք դրա կարիքը զգացող մարդկանց:
Ցանկանում եմ, որ այս հանդիպումից հետո յուրաքանչյուր մասնակից երիտասարդ, երբ վերադառնա իր բնակության երկիր, Հայրենիքից ստացած նոր էներգիայով և ավյունով համայնքում իրագործի հայապահպանության և հայրենադարձության կարևոր գործի կյանքի կոչման առաքելությունը:
Սիրելի՛ երիտասարդներ,
Համոզված եմ, որ այս օրերի ընթացքում Հայրենիքում տեղի ունեցած հանդիպումների, բովանդակալից քննարկումների, աշխատանքային և հանգստի հետաքրքիր ու հագեցած տպավորությունների ներքո դուք ոչ միայն կշարունակեք, այլև հանդես կգաք երկրի զարգացմանը նպաստող նոր նախաձեռնություններով ու ծրագրերով:
Մաղթում եմ ձեզ հաջողություններ և նորանոր ձեռքբերումներ մեր ընդհանուր նպատակների իրականացման գործում»:
Նախարարի խոսքի ավարտից հետո Հ. Ներսեսսյանը նախարար Մ. Հայրապետյանին նվիրեց համագումարը խորհրդանշող շապիկ:
Ամերիկայի Հայ Ավետարանչական ընկերակցության 100-ամյակին նվիրված՝ ՀՀԵՀ-ին մասնակցելու համար Հայաստան էին ժամանել 150 երիտասարդներ ԱՄՆ-ից, Եվրոպայից, Մերձավոր Արևելքից, Արցախից, Ավստրալիայից: