18.09c
Երեվան
ուրբ, ապր 19
Հալպի մէջ, 16 նոյեմբերին, Հայ Աւետարանական Բեթէլ Երկրդ. Վարժարանի շրջափակէն ներս, բացումը կատարուած է Հալէպի հայկական միջ-վարժարաններու մարզական մրցաշարքին: Այս մասին կը տեղեկանանք «ՀՄԸՄ Սուրիա» ֆէյսպուքեան էջէն:
Մրցաշարքը, որուն իրենց մասնակցութիւնը պիտի բերեն հալէպահայ ութ վարժարաններու աշակերտներ, կազմակերպած է ՀՄԸՄ-ի Սուրիոյ Շրջանային Վարչութեան ՍԵՎԱՄ (Սուրիահայ երկսեռ վարժարաններու աշակերտական մարզախաղեր) մարզական յանձնախումբը:
Բացման արարողութեան ներկայ եղած են Սուրիոյ Հայ Աւետարանական Համայնքի համայնքապետ Վերապատուելի Յարութիւն Սէլիմեանը, ՀՄԸՄ-ի Սուրիոյ Շրջ. Վարչութեան եւ Սկաուտական Խորհուրդի անդամներ, վարժարաններու տնօրէններ, մարզիչներ եւ աշակերտներ:
ՀՄԸՄ-ի Սուրիոյ Շրջ. Վարչութեան ատենադպրուհի՝ Գարօլին Քիւրքլեան-Արոյեան փոխանցելով Շրջ.Վարչութեան խօսքը, նշած է, որ 2018-2019 տարեշրջանի մրցաշարքը նուիրուած է ՀՄԸՄ-ի 100 ամեակին։ Ան ողջունած է Հալէպահայ ութ վարժարաններու տնօրէնութիւնները, հոգաբարձութիւններն ու ուսուցչական կազմերը եւ աշակերտներուն մաղթած աշխոյժ մրցակցութիւն:
ՍԵՎԱՄ Յանձնախումբի ատենապետ՝ Եղիա Քիլէճեան եւս խօսք առնելով, նշած է, որ ՀՄԸՄ-ը հիմնադրուած օրէն կը միտի մարզական առոյգ ոգին սերմանել հայ նոր սերունդին մէջ եւ ընկերային առողջ մթնոլորտ ստեղծել անոնց համար: Ան նշած է որ այս տարի նոր մարզախաղեր աւելցած են մրցաշարքին (աթլէթ, լող, քարաթէ եւ քունկ ֆու):
Իր սրտի խօսքը փոխանցած է նաեւ Վերապատուելի Յարութիւն Սէլիմեան: Ան գնահատած է 100 ամեայ ՀՄԸՄ-ը, որ նոյնիսկ տագնապի տարիներուն կազմակերպեց այսպիսի ձեռնարկներ։
Ապա ներկաները ուղղուած են «Փօլատեան» սրահ, ուր Վերապատուելի Յարութիւն Սէլիմեան եւ մարզիչներ՝ Յակոբ Միսաքեան, Մկօ Սիւնպիւլեան եւ Միրէյ Թիւթիւնճեան փինկ-փոնկի ցուցադրական խաղով կատարած են մրցաշարքի բացումը:
Այնուհետեւ տեղի ունեցաւ վարժարաններու աշակերտներու մրցումները:
