Հայաստանում Ֆրանսիայի դեսպանատնից տեղեկանում ենք, որ Երևանում համերգ կունենա ֆրանսահայ մեր հայրենակից Դան Ղարիբյանը՝ իր նախկին՝ Bratsch խմբի երաժիշտների հետ: Ելույթը նախատեսված է «Fête de la Musique» փառատոնի շրջանակներում: 1982 թ.-ին ստեղծված «Fête de la Musique»-ը ամենամյա փառատոն է, որն անցկացվում է ամբողջ աշխարհում յուրաքանչյուր տարի նույն օրը՝ հունիսի 21-ին։
Հայաստանում Ֆրանսիայի դեսպանության նախաձեռնությամբ կազմակերպված երևանյան համերգը տեղի կունենա հունիսի 21-ին, ժամը 18.30-ից սկսած՝ Սիրահարների այգում, մուտքն ազատ է: Հնչելու են գնչուական բալլադներ, ֆրանսիական երաժշտության երգացանկից, Երևանին, Սալոնիկին և Օդեսային նվիրված երգեր՝ գրավիչ ձայնով Bratsch խմբի նախկին կիթառահար Դան Ղարիբյանի կատարմամբ՝ գնչուական ջազի հիանալի կատարողներ, կիթառահար Բընուա Կոնվերի և ակորդեոնահար Անտուան Ժիրարի նվագակցությամբ: Դան Ղարիբյանը Շառլ Ազնավուրին նվիրված «Ազգային հարգանքի տուրքի» արարողության ժամանակ հնչած «Հայկական վալս»-ի բառերի եւ երաժշտության հեղինակն է։
Այն ֆրանսիացի շատ երգիչների շրջանում տարածված երգ է: Այս երգը ֆրանսիական Bratsch խմբի կատարմամբ ձայնագրվել է խմբի ալբոմներից մեկում, Bratsch-ի հայ հիմնադրի՝ վոկալիստ, կիթառիստ Դեն Ղարիբյանի կատարմամբ: Ֆրանսիայում հայտնի Bratsch գնչուական խումբը մեկնաբանում է Արևմտյան Եվրոպայի գնչուական երգ-երաժշտությունը: Խմբի հիմնադիրները նպատակ են ունեցել ներկայացնել Սև Ծովից մինչև Ատլանտյան օվկիանոս տարածվող ազգերի երաժշտությունը՝ ջազի վերածելով նրանց ազգային երաժշտական ավանդույթները: Ֆրանսիայում գործող խումբը, մեծ ճանաչում ունենալով Ֆրանսիայում, նաև բազմաթիվ վայրերում է հանդես եկել, այդ թվում՝ Մոսկվայում, Ստամբուլում, Լոս Անջելեսում, Բեռլինում, Լոնդոնում, Գազայում և այլուր:
Խումբը հիմնվել է 1972-ին. երաժիշտները ոչ միայն ալբոմներ են թողարկել և համերգներ ունեցել, այլև հասցրել են հանդես գալ ֆրանսիացի աստղերի հետ: Շառլ Ազնավուրը նույնպես խմբի հետ համատեղ երգել է Bratsch-ի երգերը:
Խումբը տարիներ առաջ, երկարատև համագործակցությունից հետո բաժանվել է, և Դան Ղարիբյանը հիմնել է «Ղարիբյան տրիո»-ն:
Ֆրանսիայում հայտնի ջազային կատարող է նաև Bratsch-ի հիմնադիր Դան Ղարիբյանի դուստրը՝ Մաշա Ղարբիյանը: